Ոստիկանի գործողությունները կվիճարկվեն դատարանում. Դիմորդների ծնողները ապօրինի ձերբակալվել են
ԿԳՄՍ շենքի մոտից Բաբալյանը և Հարությունյանը ձերբակալվել էին ոստիկանության ծառայողի օրինական պահանջը չկատարելու համար։ Այս մասին լրագրողների հետ զրույցում ասաց փաստաբան Ալեքանդր Կոչուբաևը։«Մասիս Բաբալյանը ձերբակալվել էր մայթեզրից, փողոց չէր փակել, իսկ ոստիկանությունը պահանջ էր դրել բացառապես բացել ճանապարհի երթևեկելի գոտին և այս առումով վարչական ձերբակալումն ակնհայտ ապօրինի էր։ Իսկ Հովհաննես Հարությունյանն ընդամենը ցանկացել էր միջամտել անչափահաս երեխաներին, մասնավորապես, աղջիկ երեխաներին բերման ենթարկելու գործողությանը և դրա համար է ձերբակալվել»,- ասաց Կոչուբաևը՝ նշելով, որ կամ ոստիկանությունը կդիմի վարչական դատարան և կփորձեն դրանց շրջանակներում պաշտպանվել, կամ իրենք կդիմեն վարչական դատարան, որ վարչական ձերբակալմանն ուղղված ոստիկանության գործողությունները ճանաչվեն որպես ոչ իրավաչափ։
Ինչ վերաբերում է բուհեր չընդունված դիմորդների իրավունքների վերականգնման խնդրի հանգուցալուծմանը, Կոչուբաևն ասաց, որ ամենայն հավանականությամբ կդիմեն վարչական դատարան՝ վիճարկելու կառավարության ընդունած որոշումը, քանի որ այն առերևույթ հակասում է ավելի բարձր իրավաբանական ուժ ունեցող առնվազն երկու օրենքների։
Նրա խոսքով՝ եթե հանգեն եզրակացության, որ դա ոչ այդքան արդյունավետ միջոց է իրավունքների պաշտպանության համար, կդիմեն ՍԴ։
Նա տեղեկացրեց, որ այսօր և վաղը տեղի կունենան լիազորագրերի հավաքագրման գործընթացը, իսկ չորեքշաբթի օրը կդիմեն կամ Վարչական դատարան, կամ ՍԴ և ՄԻԵԴ։
Անդրադառնալով ժամկետներին՝ Կոչուբաևն ասաց, որ կա իրավական գործընթաց՝ ժամանակավորապես ստատուս քվոն պահպանելու տեսքով և երեք տարբերակներից որևէ մեկն ընտրելու դեպքում էլ պահանջ կդրվի, որ պահպանվի ստատուս-քվոն։ Բացի այդ՝ նա նաև հայտնեց, որ կառավարության ոլորտը կարգավորող հին կանոնակարգը դեռևս ուժը կորցրած չի ճանաչվել։
«Այն, որ կարգը հակասում է օրենքին, կասկածից վեր է և սա վիճարկման է ենթակա Վարչական դատարանում, սակայն խնդիրներ կան նաև Սահմանադրականության հետ։ Եթե հանգենք վերջնական եզրակացության, որ մեզ համար թիրախային է հակասահմանադրականության հարցը, կդիմենք ՍԴ»,- ասաց Կոչուբաևը։
