Վարձկանների ներգրավումը վկայում է, որ ադրբեջանցիներին իրենց զինուժը չի հերիքում.ինչ է դրանից շահելու
Սիրիայից վարձկաններ բերելու համար կամ ինչ-որ մեծ ռազմական գործողություններ են պլանավորում, և իրենց զինուժը չի հերիքում, նրանք ստիպված ուրիշ ուժերի օգնությանն են դիմում, կամ էլ չգիտեմ, անիմաստ բան են անում: Զինյալներին պատրաստելը բավականին երկար ժամանակ է պահանջում, ռազմական առումով՝ անհասկանալի է՝ ինչ է դրանից Ադրբեջանը շահելու, եթե խոսքը լայնածավալ ռազմական գործողության մասին չէ»,- ԳԱԼԱ-ի հետ զրույցում նման կարծիք հայտնեց ռազմական փորձագետ Կարեն Վրթանեսյանը՝ անդրադառնալով Հայաստանի և Արցախի դեմ ռազմական գործողություններին մասնակցելու համար Ադրբեջանի տարածքում սիրիական զինյալների պատրաստման մասին տեղեկություններին:Նրա խոսքով՝ այս պահի դրությամբ Ադրբեջանը կենդանի ուժի խնդիր չունի, և վարձկանների ներգրավումը ռազմական տեսանկյունից ադրբեջանցիներին լուրջ առավելություն չի կարող տալ և իրականում ավելի շատ խնդիրներ է ստեղծելու իրենց համար:
«Սիրիական ապստամբները, վարձկանները գործոն են դառնում միայն այնպիսի միջավայրում, որտեղ ունեն բազմաթիվ համակիրներ հատկապես բնակչության շրջանում: Սիրիայի զինյալները, ահաբեկչական կազմակերպությունները, որոնք գործում էին Սիրիայում և Իրաքում, գործում էին այն բանի հաշվին, որ տեղի սուննի բնակչությունը իրենց որոշ չափով աջակցում էր: Մեզ մոտ այդ գործոնը չկա, որովհետև մենք ընդհանրապես չունենք մուսուլման բնակչություն: Զինյալները չեն կարող այն դերը կատարել, որը կատարում է արաբ սուննի բնակչությունը Իրաքում կամ Սիրիայում: Ահաբեկչական կազմակերպությունները ոչինչ չեն կարող անել Հայաստանում, իսկ ռազմական գործողությունների դեպքերում իրենք մեր թատերաբեմին ծանոթ չեն և մինչև այդ թատերաբեմին ծանոթանան, ամիսներ և տարիներ կանցնեն»,- հայտարարեց Վրթանեսյանը:
