Թուրքերը ևս մեկ հին հայկական եկեղեցի են վաճառքի հանել. շարունակում են քրիստոնեական եկեղեցիների ու մշակութային կոթողների` ախոռի վերածման քաղաքականությունը

Թուրքիայում շարունակում են քրիստոնեական եկեղեցիների ու մշակութային կոթողների վաճառքի կամ դրանց ախոռի վերածման քաղաքականությունն ու գործունեությունը: Այս մասին տեղեկացնում է ermenihaber.am-ը։

Նախորդ շաբաթ թուրքական առևտրային կայքերից մեկում Բուրսա քաղաքի Սեբթաշը թաղամասում գտնվող հայկական կաթոլիկ եկեղեցին 6 մլն թուրքական լիրայով վաճառքի հանվելուց հետո նախօրեին «Sahibiden.com» կայքում վաճառքի է հանվել Բուրսայի մյուս հայկական եկեղեցին։ Վերջին եկեղեցու համար հայտարարություն տեղադրող անձը վաճառքի համար 6 մլն 300․000 թուրքական լիրա է սահմանել։

Հայտարարությունում, որտեղ մանրամասներ չկան եկեղեցու անվան և վայրի մասին, նշվում է, որ պատմական եկեղեցին կարող է ծառայել որպես մշակույթի-արվեստի կենտրոն, թանգարան կամ հյուրանոց։

«Վաճառքի է հանվել Բուրսայի շրջանում գտնվող և մասնավոր սեփականության կարգավիճակ ունեցող պատմական եկեղեցին։ Եկեղեցին, որը կառուցվել է այստեղ ապրող հայերի համար, փոխանակությունից (1923թ․ հույն-թուրքական բնակչության փոխանակություն) հետո բնակիչների հեռանալու պատճառով անցել է մասնավոր սեփականության և 1923թ․ ի վեր մի որոշ ժամանակ շահագործվել է որպես ծխախոտի պահեստ, այնուհետև կարի ֆաբրիկա»,-ասվում է հայտարարությունում։

Նշենք, որ մինչև 1915թ. Բուրսայում և հարակից շրջաններում եղել է 17 հայկական եկեղեցի (Սբ. Աստվածածին, Սբ. Հրեշտակապետ, Սբ. Սարգիս, Սբ. Թադևոս Բարդուղիմեոս, Սբ. Հակոբ, Սբ. Գրիգոր Լուսավորիչ, Սբ. Կարապետ և այլն):

***

«Արդյո՞ք վաճառվում է երկրպագության վայրը: Ինչպե՞ս կարող են հասարակությունն ու պետությունը դա թույլ տալ։ Ամոթ ձեզ»,- Թուրքիայի խորհրդարանի հայազգի պատգամավոր Կարո Փայլանը ֆեյսբուքյան իր էջում անդրադարձել է հայկական եկեղեցու վաճառքին։

Ավելի վաղ, լրագրող Արիս Նալճը թվիթերում գրել էր, որ Թուրքական կառավարության կողմից բռնագրավված հայկական եկեղեցին Բուրսայում վաճառքի է հանվել 800. 000 դոլարով (6.3 միլիոն թուրքական լիրայով):

Բուրսա քաղաքի Սեթբաշը թաղամասում գտնվող 300-ամյա հայկական եկեղեցին վաճառքի էր հանվել դեռ 2016 թվականին։ Քանի որ Թուրքիայում եկեղեցին գնելու ցանկություն ունեցող չէր հայտնվել, անշարժ գույքի վաճառքի հարցով զբաղվող ընկերությունը թարմացրել է տեղեկատվութունը։