Քոչարյանի մասնակցությունը ընտրություններին.Եթե մինչ այդ Հայաստանի շուրջ իրավիճակը ծայրահեղ չլարվի, ականատես կլինենք կոշտ պրոցեսի
Տարիներ շարունակ տևած հակաքարոզչության արդյունքում հանրային ընկալումը Քոչարյանի նկատմամբ միշտ եղել է բավական խտրկան, որը հաճախ ռացիոնալ քննարկման դաշտ բերելու պայմաններում չի դիմացել որևէ քննադատության։ Այսինքն, մարդիկ վերաբերվում էին ինչ-որ չափով բացասական, իսկ թե ինչու՝ հիմնավորել չէին կարողանում կամ ոչ միշտ էին կարողանում, դա բնականաբար, ազդել է իր քաղաքական հեղինակության վրա, բայց վերջին 3 տարվա ընթացքում, այդ թվում՝ նաև նրանց մոտ, ովքեր նրա նկատմամբ ունեցել են խտրական վերաբերնումք, այդ վերաբերմունքի փոփոխություն է տեղի ունեցել։ ArmDaily.am-ի հետ զրույցում ասաց քաղաքագետ Ալեն Ղևոնդյանն՝ անդրադառնալով ՀՀ երկրորդ նախագահ Ռոբերտ Քոչարյանի հայտարարությանը, թե մասնակցելու է արտահերթ խորհրդարանական ընտրություններին և «կրելու է»։«Թե որքանով է տեղի ունեցել այդ փոփոխությունը, իհարկե, սոցիոլոգների ուսումնասիրության առարկա է, սակայն պետք է արձանագրենք, որ նրա հարցազրույցները, հնչեցվող տեքստերը, դրանց հիմնավորվածությունը, տրամաբանական շղթաները և հատկապես պատերազմից հետոյի կոնտեքստում դրանք դիտարկելու տեսանկյունից նրա դիրքերը որոշակիորեն ամրապնդվել են։ Կարծում եմ, քաղաքական հայտի ձևակերպումը ինչ-որ չափով նաև հիմնավոր էր, որովհետև կար երկու այլընտրանք, կամ գործող իշխանությունը վայր է դնում մանդատը, ինչպես նախկինում՝ խորհրդարանն ընտրում է վարչապետ, այդ թվում, նաև չցանկանալով ընտրել այդ թեկնածուին, ինչպես դա եղավ Փաշինյան Նիկոլի հետ, ՀՀԿ-ի խորհրդարանում, կամ տեղի են ունենում արտահետք ընտրություններ։ Հիմա ընտրվեց այս տարբերակը և Քոչարյանը, որ երբեք գաղտնի չէր պահել իր քաղաքական հավակնությունները, հանրայնացրեց դա։ Կարծում եմ, մենք ականատես կլինենք բավական կոշտ, տարբեր տիպի քարոզչական հնարքներով լի, ինչ-որ չափով նաև օրենքի խախտմամբ և վարչական ռեսուրսի օգտագործմամբ ընտրական և նախընտրական պրոցեսների, եթե մինչ այդ Հայաստանի շուրջ իրավիճակը ծայրահեղ չլարվի։ Իսկ ընտրությունները ինչպես գիտենք նախանշված են»։
