Տեսանյութ.Մենք կողմ ենք սահմանների սահմանազատմանը, բաց լեգիտիմ սահմանների, որը հանդիսանում է առաջին հանրապետության սահմանները          Տեսանյութ. Երբ խոսում ենք անվտանգության մասին, ապա ամեն ինչ սկսվում է կրթությունից, դպրոցից       Իլհամ և Մեհրիբան Ալիևները մեկնել են ԼՂ    

17 մար 2021 12:18

Խանութներ՝ Անկարայի հայկական գերեզմանատան վրա. Փայլանին թույլ չեն տվել մտնել տարածք

Քրդամետ Ժողովուրդների դեմոկրատական կուսակցության հայ պատգամավոր Գարո Փայլանին մարտի 16-ին թույլ չեն տվել մուտք գործել Անկարայի Ուլուս թաղամասում գտնվող տարածք, որտեղ Թուրքիայի կառավարության բնակարանաշինության զարգացման վարչությունը (TOKİ) շինարարություն է իրականացնում պատմական հայկական գերեզմանատան վրա: Այս մասին հայտնում է Bianet-ը:

Առաջինը Թուրքիայի ճարտարապետների պալատի Անկարայի մասնաճյուղն էր մարտի 10-ին ահազանգել այն մասին, որ մայրաքաղաքի պատմական Ուլուս թաղամասում խանութներ են կառուցելու պատմական հայկական գերեզմանատան վրա: Մասնաճյուղի տարածած հաղորդագրության մեջ մասնավորապես նշվում էր. «Գիտական աղբյուրներում ասվում է, որ այս տարածքը եղել է հայկական և կաթոլիկ գերեզմանատուն: Անօրինական փորման աշխատանքների արդյունքում հայտնաբերվել են մարդկային ոսկորներ, որոնք Անատոլիական քաղաքակրթությունների թանգարանի կողմից տարվել են ուսումնասիրման: Չնայած այս ամենին՝ այս տարածքում շինարարության շարունակումը մեծ անարգանք է անատոլիական հողերում բազմամշակութայնության նկատմամբ: Սա բարբարոսություն է, մարդու իրավունքների ոտնահարում»:

Թուրքիայի մեջլիսի հայ պատգամավոր Գարո Փայլանը հարցը բարձրացրել էր մեջլիսում: Նա հարցում էր արել Շրջակա միջավայրի և քաղաքաշինության նախարար Մուրադ Քուրումին՝ նշելով, որ թեպետ շինարարության ժամանակ այդ տարածքում հայտնաբերվել են մարդկային ոսկորներ, սակայն շինարարական աշխատանքները չեն կասեցվել: Պատգամավորը հետաքրքրվել էր, թե ինչու չի դադարեցվում շինարարությունը, արդյոք TOKİ-ն տեղյակ է, որ այդպիսով ոչնչացնում է Անկարայի մշակութային հարստությունն ու քաղաքային հիշողությունը, և ինչու է բետոն լցվում հայերի ոսկորների ու մշակութային հարստության վրա: Նախարար Մուրադ Քուրումը դեռևս չի արձագանքել Փայլանի հարցմանը:

Մարտի 16-ին հայ պատգամավորը Թուրքիայի ճարտարապետների պալատի Անկարայի մասնաճյուղի նախագահի և մի խումբ այլ անձանց հետ ցանկացել է տեղում ծանոթանալ իրականացվող շինաշխատանքներին, սակայն նրանց թույլ չեն տվել մուտք գործել տարածք: Արդյունքում Փայլանը ստիպված է եղել արգելապատնեշների մոտ հանդես գալ հայտարարությամբ՝ ասելով. «Այս վայրը հայերի գերեզմանատունն է եղել: Այս հողերում ապրող հայերը արտաքսվել են այստեղից: Անարգանքի են ենթարկվել ոչ միայն ապրողները, այլև մահացածները: Այստեղ ապրած հայ ժողովուրդն իր սիրելիներին աղոթքներով թողել է հանգչելու այստեղ՝ շիրմաքարեր դնելով: Իսկ հիմա շիրիմների վրա բետոն է լցվում: Ո՞ր խիղճը կարող է ընդունել սա»:

Զարմանք արտահայտելով այն փաստի առնչությամբ, որ իրենց արգելվում է մուտք գործել տարածք՝ Փայլանը նշել է, որ այդտեղ անօրինական շինարարություն է իրականացվում, քանի որ չկան համապատասխան թույլտվություններ: «Ես պահանջում եմ, որ րոպե առաջ կանգնեցվի այս անօրինական շինարարությունը, կասեցվի հայ ժողովրդի շիրիմներին բետոն լցնելը: Խորհրդարանն ու քաղաքացիական հասարակությունը և առաջին հերթին Անկարայի բնակչությունը պետք է կանգնեցնեն հայկական գերեզմանի վրա բետոն լցնելը: Անկարայի ժողովուրդը արժանի չէ նման անարգանքի»,- հայտարարել է Փայլանը:

Մեկնաբանություններ

Համընկնող լուրեր