Ալիևը հրամայել է հուշարձանների վրայից ջնջել հայկական գրությունները
Ադրբեջանի նախագահ Իլհամ Ալիևը հրամայել է Արցախի Հանրապետության օկուպացված տարածքներում գտնվող հուշարձանների վրայից ջնջել բոլոր հայկական գրությունները: Այս մասին Twitter-ում հայտնել է Նիդերլանդներում Հայաստանի դեսպան Տիգրան Բալայանը։ «Ադրբեջանի բռնապետն անձամբ է հրահանգել ջնջել Արցախի օկուպացված տարածքներից հայկական հետքերը։ Ալիեւի ռեժիմի ռազմական հանցագործությունները շարունակվում են ամբողջ ծավալով», - գրել է Բալայանը։
Հիշեցնենք, որ նախօրեին Ալիևը կնոջ ու դստեր հետ այցելել էր Հադրութ։ Հրապարակված տեսանյութերն ուսումնասիրելուց հետո լրատվամիջոցները նկատել էին, որ եկեղեցիներում արդեն խաչեր չկան, ուստի պատահական չէ, որ Ալիևն արգելում է ՅՈՒՆԵՍԿՕ-ի ներկայացուցիչներին այցելել Արցախ և իրականացնել պատմական հուշարձանների գույքագրում։
