Տեսանյութ.Մենք գործ ունենք ծրագրված գործողության հետ․Թուրքիայի հետ խոսելու համար մենք պետք է ունենանք նախապայմաններ
Մենք գործ ունենք ծրագրված գործողության հետ։ Այս մասին լրագրողների հետ զրույցում ասաց իրանագետ Վարդան Ոսկանյանը՝ անդրադառնալով իշխանության կողմից օրակարգ մտցված Թուրքիայի հետ երկխոսելու հարցին։«Եթե հետևեք թրքամետ հայտարարություններին, ապա կտեսնեք, որ կա դրա գաղափարական աջակցությունը և կա դրա իմպլեմենտացիան՝ կիրարկումը՝ քաղաքական գործիչ համարվողների կողմից»,–ասաց նա։
Վարդան Ոսկանյանը նկատեց, որ կարծում է, թե Թուրքիան հստակորեն արձագանքում է դրան՝ ցույց տալով, որ Թուրքիան չի ուզում ընդհանրապես խոսել մեզ հետ, հետևաբար հարցը պետք է ի սկզբանե փակված համարել։
«Այսօր Թուրքիայի հետ խոսելու համար մենք պետք է ունենանք նախապայմաններ, որոնք բխում են նաև 44-օրյա պատերազմում գրանցած, մեզ համար տխրահռչակ արդյունքներից։ Կարծում եմ, որ տարածաշրջան ահաբեկիչներ ներմուծող պետության հետ խոսելը տեղին չէ»,–ասաց նա։
Վարդան Ոսկանյանը նշեց, որ նախապայմանները պետք է վերաբերեն Թուրքիայի դիրքորոշումների փոփոխություններին։
«Այսինքն՝ այսպիսի Թուրքիայի հետ Հայաստանը չի կարող ոչ միայն խոսել, չի կարող հարաբերվել, այլ պետք է պայքարի այսպիսի Թուրքիայի դեմ։ Մեր հասարակությունը հստակ կերպով ցույց տվեց, որ երբ փորձում են, պատկերավոր ասած, խափանել մեր հավաքական իմունիտետը, որով ապահովվում է անվտանգության որոշ բաղադրիչ, ապա պատասխանը որոշ դեպքերում կարող է լինել ծայրահեղ։ Այս հարթությունում, կարծում եմ, գործ ունենք մի վարչախմբի հետ, որն առաջնորդվում է բազմաթիվ շահերով, բայց ոչ երբեք Հայաստանի Հանրապետության շահերով»,–ասաց նա։
