Պատվաստումից հետո բարդություններ են եղել, պետությունը կհոգա նրանց կրկնակի հետազոտության ծախսերը
Եթե պատվաստանյութի երրորդ բաղադրիչի կարիքը լինի, ապա այն ձեռք կբերվի։ Այս մասին ԱԺ-ում Մարդու իրավունքների պաշտպանության եւ հանրային հարցերի մշտական հանձնաժողովի նիստում ասաց առողջապահության նախարար Անահիտ Ավանեսյանը:Նրա խոսքով՝ ոչ մի դեղամիջոց, ոչ մի բժշկական միջամտություն չի կարող 100% երաշխիք տալ, որ հիվանդը չի վարակվի որեւէ վարակով: «Կորոնավիրուսը բացառություն չէ: Վիճակագրության համաձայն՝ պատվաստվածների, սակայն վարակվածների մինչեւ 20%-ը ծանր է տանում հիվանդությունը։ Միայն 5%-ը հայտնվում է ծայրահեղ ծանր վիճակում, իսկ 2%-ը մահանում է: Բայց սա չի նշանակում, որ պատվաստում պետք չէ»,-ասաց Ավանեսյանը։
Ինչ վերաբերում է պատվաստումից հետո բարդությունների խնդրին, Ավանեսյանը խոստովանեց, որ քաղաքացիներից բողոքներ են եղել:
«Սակայն, անհրաժեշտության դեպքում, պետությունը կհոգա նրանց կրկնակի հետազոտության ծախսերը»,-վստահեցրեց նախարարը։
Այո, որոշակի տարբերակված վերաբերմունք պատվաստանյութերի հանդեպ կա։
Նրա խոսքով՝ յուրաքանչյուր արտադրող երկիր ինքն է որոշում իր սեփական քաղաքականությունը պատվաստման մասով։ «Ասենք՝ ո՞ր պատվաստանյութին տալ նախապատվությունը, ի՞նչ չափով ուսումնասիրել այս կամ այն պատվաստանյութի գրանցումը եւ ո՞ր փուլում թույլատրել պատվաստանյութի ներկրումը երկիր։ Բայց Հայաստանն առաջնորդվում է մեկ սկզբունքով՝ հանրապետությանը հնարավորություն տալ ունենալ այնքան պատվաստանյութեր, որոնք թույլ կտան քաղաքացիներին ազատ տեղաշարժվել տարբեր երկրներում»,- պարզաբանել է Ավանեսյանը։
