Արտասովոր տեսարանը ապշեցրել է ֆրանսիացիներին.թե ինչպես և ինչու է մեքենան հայտնվել կանգառի տանիքին
Ֆրանսիայի Բրետան շրջանի Պլունեվանտե քաղաքի բնակիչներն ապշել են՝ առավոտյան բավականին տարօրինակ տեսարանի ականատես լինելով:Ինչպես գրում է Oddity Central-ը, մարդիկ առավոտյան տնից դուրս գալով ավտոբուսի կանգառի տանիքին «կայանված» մեքենա են տեսել: Շատերը լուսանկարել են սպիտակ մեքենան՝ Place de l’Eglise հրապարակի ավտոբուսի կանգառի գագաթին և լուսանկարները հրապարակել սոցցանցում:
Տարօրինակ երևույթի մասին տեղեկացվել է նաև քաղաքի ժանդարմերիային: Իրավապահները ևս մի քանի լուսանկար են արել, ապա իջեցրել մեքենան: Սակայն նրանք չեն կարողանում որևէ բացատրություն գտնել, թե ինչպես է մեքենան հայտնվել այնտեղ:
«Դա իրական առեղծված է: Մենք գիտենք՝ ով է մեքենայի սեփականատերը, սակայն չգիտենք՝ ինչպես է այն հայտնվել այդտեղ և թե ինչու»,- ֆրանսիական ԶԼՄ-ներին հայտնել է կապիտան Քրիստոֆ Լավալը:
Բնակիչները սկզբում մտածել են, որ դա որևէ արտիստի կողմից իրականացված ժամանակակից արվեստի ցուցադրություն է կամ մարքեթինգային նախագծի մի մաս, սակայն ոստիկանությունից նշել են, որ այդ տարբերակներից ոչ մեկն էլ իրականությանը չի համապատասխանում:
Մեկ շաբաթ մարդկանց տարակուսանքի մեջ պահող իրադարձությունը վերջապես գտել է իր բացատրությունը: Նախօրեին ֆրանսիական ԼԶՄ-ները հայտնել են, որ առեղծվածը վերջապես լուծված է: Ինչպես պարզվում է, կատարվածի պատճառը մեքենայի սեփականատիրոջ և այդ տարօրինակ հնարքի հեղինակի միջև տեղի ունեցած «առևտրային վեճն» է եղել: Զայրացած լինելով՝ վերջինս մեքենան հատուկ պալետային հարմարանքի միջոցով բարձրացրել է կանգառի տանիք:
