Անկարան «Բայրաքթար»-ի մատակարարումները չի կապում Մոսկվայի և Կիևի միջև լարվածության հետ
Թուրքական «Բայրաքթար» անօդաչու թռչող սարքերի մատակարարումն Ուկրաինային կապ չունի Մոսկվայի և Կիևի միջև լարվածության հետ։ ՏԱՍՍ-ի փոխանցմամբ, այդ մասին կիրակի օրը հայտարարել է Թուրքիայի պաշտպանական արդյունաբերության դեպարտամենտի ղեկավար Իսմայիլ Դեմիրը։«Մենք Ուկրաինային վաճառել ենք անօդաչու թռչող սարքերի մի խմբաքանակ: Այսօր, երբ Ռուսաստանի հետ լարվածություն կա մենք այլևս չենք վաճառում: Այդ խմբաքանակի վերաբերյալ պայմանավորվածություններ կային, որոնք վաղուց էին քննարկվել, Ուկրաինան ուներ որոշակի արտադրություն և ներդրումներ էր կատարել: Այն կապված չէ վերջին իրադարձությունների հետ, չպետք է կարծիք ստեղծվի, որ Թուրքիան անօդաչու թռչող սարքեր է ուղարկում Ուկրաինա Ռուսաստանի հետ լարվածության պատճառով»,- Milliyet թերթին տված հարցազրույցում ասել է Դեմիրը։
Ուկրաինայի զինված ուժերի գլխավոր շտաբը ավելի վաղ հաստատել էր, որ ուկրաինացի զինվորականները հոկտեմբերի 26-ին Դոնբասում առաջին անգամ օգտագործել են Անկարայի կողմից մատակարարված «Բայրաքթար» անօդաչու թռչող սարքը։ Ուկրաինայի զինված ուժերի միացյալ հրամանատար, գեներալ-լեյտենանտ Սերգեյ Նաևը հայտնել է, որ բայրաքթարները միշտ օդ են բարձրանում մարտական զինամթերքով և օգտագործվում այնտեղ, որտեղ ուժեղացում է անհրաժեշտ։
