Կեղծ հերքումներ մի տարածեք
Երեկ մենք «Հրապարակ» թերթում եւ hraparak.am կայքում հրապարակում ունեինք․«Նախագահ Արմեն Սարգսյանի հրաժարականը շարունակում է հետաքրքրել հանրությանը: Մեզ նոր տեղեկություններ են հայտնի դարձել՝ այս թեմայի հետ կապված: Պարզվում է` Կոռուպցիայի կանխարգելման հանձնաժողովը, որի հիմնական գործառույթը «բարձրաստիճան պաշտոնատար անձանց անհամատեղելիության պահանջների եւ այլ սահմանափակումների, ինչպես նաեւ էթիկայի կանոնների, իրավիճակային շահերի բախման կարգավորումների պահպանմանը հետեւելն է եւ եկամուտների հայտարարագրերը ստուգելն ու վերլուծելը», դեռեւս ամիսներ առաջ սկսել է ուսումնասիրել Արմեն Սարգսյանի ունեցվածքը եւ մասնավորապես «Հետքի» հրապարակումը՝ «Նախագահ Սարգսյանին փոխկապակցված ընկերությունը 7.5 մլն եվրոյով գույք է գնել Փարիզի Ելիսեյան դաշտերի մոտ», որտեղ շոշափվում են նախագահի քրոջ՝ բժիշկ Կարինե Սարգսյանի, ու դստեր՝ Տաթեւիկ Սարգսյանի անունները: Սակայն այս գործով որեւէ շոշափելի հիմքեր չեն գտել` վարույթ սկսելու: Այդ ուսումնասիրությունները չավարտված` շվեյցարական մի ընկերությունից հանձնաժողովը հարցում է ստացել, որով հետաքրքրվել են` արդյո՞ք ՀՀ նախագահը Հայաստանում հայտարարագրե՞լ է Շվեյցարիայում առկա գույքն ու դրամական միջոցները: Հանձնաժողովը գրությամբ դիմել է նախագահի աշխատակազմին` պարզաբանում ստանալու, պատասխան չի ստացել, իսկ մի քանի օր անց Արմեն Սարգսյանը հրաժարականի դիմում է ներկայացրել»:
Մեր հրապարակմանն արձագանքել է նախագահի պաշտոնից հրաժարական ներկայացրած Արմեն Սարգսյանը` գրելով.
«Ի պատասխան որոշ ԶԼՄ-ների հրապարակումների՝ հայտնում ենք, որ
Հանրապետության չորրորդ նախագահ Արմեն Սարգսյանը սպառիչ պատասխանել է կոռուպցիայի կանխարգելման հանձնաժողովի ներկայացրած հարցերին և տրամադրել համապատասխան տեղեկություններ: Արմեն Սարգսյանը Շվեյցարիայում երբեք անշարժ գույք չի ունեցել և չունի:
Հետևաբար, այս թեմայով հրապարակումները չեն համապատասխանում իրականությանը և հասարակությանը մոլորեցնելու նպատակ են հետապնդում»:
Մենք կրկին փորձեցինք ստուգել մեր տեղեկատվության իսկությունը, մեզ վստահեցրին, որ Հակակոռուպցիոն հանձնաժողովը շարունակում է ուսումնասիրել ՀՀ նախագահ Արմեն Սարգսյանի եկամուտների հայտարարագրերը, դրանցում առկա անհամապատասխանությունները եւ արտերկրում ունեցած գույքի ու դրամական միջոցների մասին տեղեկատվությունը, մասնավորապես` «Հետքի» հրապարակումներն են առիթ հանդիսացել:
Ավելին` պաշտոնն ավարտելու դրությամբ նա նոր հայտարարագիր է ներկայացնելու եւ դա եւս համադրվելու է հին հայտարարագրերի հետ: Ֆրանսիայում առկա գույքն ու շվեյցարական բանկերում առկա դրամական միջոցները եւս քննության առարկա են դառնալու, բնականաբար: Մեկ ճշտում արեցին մեր հրապարակման հետ կապված` «ուսումնասիրությունները չեն ավարտվել եւ եզրակացությունը, որ «շոշափելի հիմքեր չեն գտել` վարույթ սկսելու համար» խիստ վաղաժամ է, քանի որ այն դեռ շարունակվում է»:
Ստիպված ենք փաստել, որ իր նորաբաց ֆեյսբուքյան էջով «պետական գործիչ, Հայաստանի Հանրապետության չորրորդ նախագահ, Հայաստանի Հանրապետության նախկին վարչապետ, արտակարգ և լիազոր դեսպան, ֆիզիկամաթեմատիկական գիտությունների թեկնածու, պրոֆեսոր Արմեն Սարգսյանն», ըստ էության կեղծ հերքում է տարածում՝ գուցե փորձելով կանխորոշել Հանձնաժողովի ուսումնասիրությունների ելքը։
Ամբողջական հոդվածը կարող եք կարդալ
«Հրապարակ օրաթերթ»
