Որքա՞ն է հավանականությունը լայնամասշտաբ պատերազմի.Հայկական ստորաբաժանումները շատ ավելի արագ են հասել բարձունքին, քան ադրբեջանցիները
Արցախում Քարագլխի նկատմամբ վերահսկողություն ունեն հայկական համապատասխան ուժային ստորաբաժանումներն ու ռուս խաղաղապահները: Այս մասին, այսօր՝ մարտի 25-ին, լրագրողների հետ զրույցում նշեց ԱԺ «Պատիվ ունեմ» խմբակցության պտատգամավոր Տիգրան Աբրահամյանը:«Ադրբեջանցիները Փարուխում ներխուժում ապահովելուց հետո տարբեր խմբերով շարժվել է Քարագլխի ուղղությամբ՝ նպատակ ունենալով ամբողջական վերահսկողություն հաստատել բարձունքում: Այդ բարձունքը թե մեր, թե ադրբեջանցիների համար ռազմավարական մեծ նշանակություն ունի: Ադրբեջանական տորաբաժանումները չեն կարողացել ամբողջական վերահսկողություն ապահովել, դա կանխվել է եւ ռուս խաղաղապահների կողմից, եւ այն պատճառով, որ հայկական ստորաբաժանումները շատ ավելի արագ են հասել բարձունքին, քան ադրբեջանական ստորաբաժանումները:
Այս պահին Ադրբեջանը փորձում է ամրանալ Փարուխի հարակից հատվածներում եւ Քարագլխի ճանապարհի այն տեղանքում, որտեղ հասել է: Իմ տեղեկություններով, Ադրբեջանը փորձում է այդ հատվածներում, որտեղ ապահովել է ներխուժումը, ամրաշինական աշխատանքներ իրականացնել, ինչը դժվարացնում է բանակցությունների գործընթացը», - ասաց Աբրահամյանը։
Հարցին, թե որքան է իրատեսական լայնամասշտաբ պատերազմի հավանականությունը, նա պատասխանեց, որ որեւէ փուլում դրա հավանակությունը կարող է լինել. «Այս պահինշատ ավելի կարճաժամկետ կտրվածքով այդպիսի ռիսկեր գնահատելը բավականին բարդ է: Համենայնդեպս, վտանգավորություն այն է, որ իրադարձությունները բավականին արագ են զարգանում, դժվար է արագ կանխատեսումներ անելը: Բայց այն, որ Ադրբեջանի համար խաղաղության օրակարգը իր հավակնությունների ամբողջական բավարարումն է, դա միանշանակ է»:
