Ռուսաստանը Հայաստանին սննդամթերքով կապահովի նվազագույն գներով
Ռուսաստանը պատրաստ է Հայաստանի հետ տնտեսական համագործակցության առավելագույն մակարդակ ապահովել։ Այս մասին Sputnik Արմենիա միջազգային մուլտիմեդիոն մամուլի կենտրոնում հայտարարել է «Արդար Ռուսաստան՝ հանուն ճշմարտության» խմբակցության ղեկավարի առաջին տեղակալ, Պետական դումայի ագրարային հարցերով հանձնաժողովի նախագահի առաջին տեղակալ Օլեգ Նիլովը։Ռուսաստանի մի խումբ խորհրդարանականներ Հայաստան են ժամանել ՌԴ Դաշնային ժողովի և ՀՀ Ազգային ժողովի միջև համագործակցության միջխորհրդարանական հանձնաժողովի 34-րդ նիստին մասնակցելու նպատակով։
«Ռուսաստանի կողմից առավելագույն առաջարկներ կլինեն։ Այլ հարց է, թե որքանով Հայաստանը կկարողանա առավելագույնս իրացնել իր շահերը»,- նկատել է նա։
Պատգամավորն ավելացրել է, որ «Հայաստանի կառավարությունը, ժողովուրդը կորոշեն, թե որքան սերտ ենք զարգացնելու մեր շփումները»։
Խոսքը նախևառաջ ագրարային հատվածում երկկողմ համագործակցության զարգացման մասին է։
Նա կարծում է, որ Հայաստանը կարող է զարգացնել գյուղմթերքի արտադրությունը՝ Ռուսաստան արտահանելու համար։
«Հասկանալի է, որ հացը, ձեթը և էլի շատ բաներ Ռուսաստանը Հայաստանին կապահովի լրիվ ծավալով և նվազագույն գներով»,- նշել է Նիլովը։
Քննարկվում է նաև փոխադարձ հաշվարկները ազգային արժույթներով, առանց եվրոյի և դոլարի «միջնորդության» կատարելու հարցը, ինչը կնպաստի երկու երկրների քաղաքացիների բարեկեցության աճին, ասում է ռուս խորհրդարանականը:
Ռուսաստանը շարունակում է Հայաստանի առաջատար առևտրաներդրումային գործընկեր մնալ, նրա մասնաբաժինը Հայաստանի ընդհանուր առևտրում գերազանցում է 30 տոկոսը: Համավարակի շրջանում անկումից հետո հաջողվել է ապրանքաշրջանառությունը վերադարձնել կայուն աճի հետագծի։ Անցյալ տարի այն կազմել է 2,6 մլրդ դոլար։
