Պուտինի բանակը սկսել է որոշակի հաջողություններ գրանցել,Դոնբասում իրավիճակը «չափազանց վատ է» ուկրաինական զորքերի համար
Ուկրաինայի արտաքին գործերի նախարար Դմիտրի Կուլեբան, ելույթ ունենալով Դավոսի միջազգային տնտեսական համաժողովում, ասել է, որ Դոնբասում իրավիճակը «չափազանց վատ է» ուկրաինական զորքերի համար։Նրա խոսքով՝ դա կարող է էլ ավելի վատանալ, եթե ԱՄՆ-ը որքան հնարավոր է շուտ Ուկրաինային չփոխանցի համազարկային կրակի ինքնագնաց ռեակտիվ համակարգեր։
«Ես այստեղ գրեթե տասը երկկողմանի հանդիպում եմ ունեցել։ Երբ մեկին ասում եմ՝ ես գիտեմ, որ դու ՀԿՌՀ ունես, մեզ շատ է պետք, տուր մեզ, առաջին հարցը, որ ստանում եմ, սա է՝ «ամերիկացիները ձեզ չե՞ն տվել դեռ»», - ասել է Կուլեբան:
«Սա առաջնորդի բեռն է. բոլորը նայում են ձեզ: Վաշինգտոնը պետք է կատարի իր խոստումը և հնարավորինս շուտ մեզ տրամադրի բազմաթիվ հրթիռային համակարգեր, մյուսները կհետևեն», - հավելել է Ուկրաինայի արտգործնախարարը:
BBC-ի թղթակից Ջո Ինվուդը Կիևից հայտնում է, որ Վլադիմիր Պուտինի բանակը սկսել է որոշակի հաջողություններ գրանցել՝ ռուսական ուժերը բեկումնային գործողություններ են կատարում Դոնբասում։ Վերջին մի քանի օրվա ընթացքում նրանք գրավել են մի քանի քաղաքներ ու գյուղեր՝ ստիպելով ուկրաինացիներին՝ նահանջել ավելի հարմար պաշտպանական դիրքեր։
