Ուկրաինացի ազգայնականները գնդակահարել են 32 ուկրաինացու, ովքեր որոշել էին վայր դնել զենքերը և հանձնվել
Ուկրաինացի ազգայնականների ջոկատները խաչաձև կրակ են բացել Ուկրաինայի զինված ուժերի 54-րդ բրիգադի զինծառայողների վրա, որոնք որոշել էին հանձնվել, ինչի հետևանքով 32 զինծառայող մահացու վիրավորվել և սպանվել է։ ՏԱՍՍ-ի փոխանցմամբ՝ այդ մասին երեքշաբթի օրը հայտարարել է ՌԴ պաշտպանության նախարարության պաշտոնական ներկայացուցիչ, գեներալ-լեյտենանտ Իգոր Կոնաշենկովը։Նրա խոսքով՝ Դոնեցկի Ժողովրդական Հանրապետության Նովոմիխայլովկա բնակավայրի տարածքում ռուսական զորքերի հարձակման համար կրակային նախապատրաստություն իրականացնելուց հետո, Ուկրաինայի ԶՈւ 54-րդ բրիգադի 25-րդ գումարտակի ավելի քան 30 զինծառայող որոշել էր վայր դնել զենքերը և հանձնվել:
«Մոտավորապես ժամը 22-ի սահմաններում Ուկրաինայի զինված ուժերի զինծառայողները սպիտակ դրոշներով սկսել են առաջ շարժվել դեպի ռուսական դիրքեր, այդ պահին զրահատեխնիկայով հենակետ ժամանած ուկրաինական ազգայնական ջոկատի ստորաբաժանումը թիկունքից կրակ է բացել Ուկրաինայի զինված ուժերի 54-րդ բրիգադի զինծառայողների ուղղությամբ։ Դրա հետևանքով մահացու վիրավորվել և զոհվել են 32 ուկրաինացի զինծառայող»,-ասել է Կոնաշենկովը։
Նրա խոսքով՝ ուկրաինացի զինվորականները, որոնք հենակետ էին գրավել կենդանիների ֆերմայի տարածքում ցանկանում էին վայր դնել զենքերը և ռադիոկապով դիմել են ռուսական ստորաբաժանման հրամանատարությանը, խնդրել դադարեցնել կրակը և միջանցք տրամադրել հանձնվելու համար։
