3 օր է՝ զինվորի մահվան հանգամանքների մասին ՊՆ–ն լռում է․ Ինչով է խառը Սուրեն Պապիկյանի գլուխը
Հունիսի 19-ին՝ կիրակի օրը, մամուլում տեղեկություն տարածվեց, որ ադրբեջանական կողմը նախորդ օրը կրակոցներ է արձակել Վարդենիսի ուղղությամբ, ինչի հետևանքով ունենք զոհ։Մամուլին անգամ հայտնի էր դարձել, որ զոհված զինծառայողն Արագածոտնի մարզի Բյուրական համայնքից է՝ ժամկետային զինծառայող Հրաչ Փիլիպոսյանը, որը մեկ տարի առաջ էր զորակոչվել բանակ։
168.am-ի հետ զրույցում հաստատել էր զոհի մասին լուրը՝ խոստանալով.
«Մանրամասները կներկայացնենք ավելի ուշ»:
Միջադեպից և մեզ տրված խոստումից անցել է արդեն մի քանի օր, սակայն դեռ ոչ մի հաղորդագրություն Սուրեն Պապիկյանի ղեկավարած պաշտպանության նախարարությունը չի տարածել, թե ժամկետային զինծառայողն ի՞նչ հանգամանքներում է մահացել՝ թշնամու կրակոցի՞ց, թե՞ բանակում առկա կարգապահական խնդիրների պատճառով: ՊՆ-ն չի պատասխանել մեր զանգերին և հաղորդագրություններին, որով փորձում էինք պարզել, թե երբ կլինեն խոստացված մանրամասները:
Հարց է առաջանում՝ արդյոք Ադրբեջանի՞ն են փրկում, որպեսզի չվնասեն խաղաղության դարաշրջանի տեսլականին, թե՞ ներսում՝ ինչ-որ մեկին: Ի դեպ, ադրբեջանական մամուլն այս դեպքի մասին հայկական լրատվամիջոցների հրապարակումներին ուշադրություն չի դարձրել:
Մյուս կողմից, պետք է հաշվի առնել մեկ այլ հանգամանք. հունիսի 19-ին տեղեկություններ եղան նաև, որ կրակոցներ են հնչել Արագածոտնի մարզում, ինչի հետևանքով, ըստ մամուլում շրջանառված լուրերի, սպանվել է նաև ՊՆ զորամասի զինծառայող Հմայակ Միքայելյանը՝ պայմանագրային:
Ըստ այդմ՝ չի բացառվում, որ Սուրեն Պապիկյանի և ՔՊ-ականների գլուխը խառն է այս հարցերով, թեև դա չի խանգարում, որ ՊՆ-ն հերքի հրադադարի խախտումների մասին ադրբեջանական տեղեկատվությունը, բայց սեփական զինվորի մասին խոստացված մանրամասների ժամանակ չեն գտնում:
ՊՆ-ն, որ իրեն հարմար առիթի դեպքում հանդես է գալիս լրատվամիջոցներին ուղղված հորդոր-կոչով՝ չվարկաբեկել բանակի հեղինակությունը, փաստորեն զլանում է զինվորի մահվան դեպքի մասին որևէ պաշտոնական տեղեկություն հաղորդել հանրությանը։
Նշենք, որ Սուրեն Պապիկյանը զինվորի զոհվելու կամ մահվան դեպքի նախօրեին այցելել էր Գեղարքունիքի զորամասեր: Գրեթե նույն ժամանակահատվածում Ադրբեջանի պաշտպանության նախարար Զաքիր Հասանովը ծանոթացել էր Քարվաճառի և Քաշաթաղի շրջաններում ռազմական նոր օբյեկտների կառուցման ընթացքին:
