«Բայրաքթար» անօդաչուների արտադրողը հերքել է ՌԴ-ի հետ համագործակցությունը, մենք աջակցում ենք Ուկրաինային
Թուրքական «Baykar Makina» ընկերությունը երբեք մարտական անօդաչու թռչող սարքերը չի մատակարարել Ռուսաստանին և հերքում է ապագայում դա անելու հնարավորությունը։ Ինչպես հաղորդում է Lenta.ru-ն, այս մասին CNN հեռուստաալիքին տված հարցազրույցում ասել է ընկերության գործադիր տնօրեն Հալուք Բայրաքթարը։«Մենք նրանց ոչինչ չենք մատակարարել կամ չենք տեղափոխել։ Ապագայում եւս չենք անի, որովհետև մենք աջակցում ենք Ուկրաինային»,- ասել է Բայրաքթարը՝ հրաժարվելով Մոսկվայի հետ համագործակցությունից։
Այս ընկերությունն արդեն մի քանի անօդաչու թռչող սարք է նվիրել Կիևին անհատույց (ուկրաինական իշխանությունները նախկինում գնել են թուրքական անօդաչու սարքեր)։ Մոսկվային դրանք մատակարարելու մասին խոսք անգամ չի եղել, սակայն ԱՄՆ նախագահի՝ ազգային անվտանգության հարցերով խորհրդական Ջեյք Սալիվանը պնդել էր, , թե, իբր, Իրանը մտադիր է Ռուսաստանին փոխանցել մինչև մի քանի հարյուր անօդաչու թռչող սարքեր։ Թեհրանը հերքել է այս հայտարարությունը։
