Ադրբեջանում ծանր են տարել Բլինքեն-Ալիև հեռախոսազրույցի մասին պետքարտուղարության հաղորդագրության մեջ Մինսկի խմբի մասին հիշատակումը

«Պետքարտուղարության հայտարարության մեջ նշվում է, որ զրույցի ընթացքում, ի թիվս այլ հարցերի, քննարկվել է ԵԱՀԿ Մինսկի խմբի ներկայացուցիչների՝ հայ-ադրբեջանական խաղաղ բանակցություններին մասնակցության վերսկսման թեման ։
Դիվանագիտական աղբյուրներից haqqin.az-ին հասած տեղեկությունների համաձայն՝ Ալիևի՝Բլինքենի հետ հեռախոսազրույցում որևէ հիշատակում Մինսկի խմբի մասին չի եղել, որի կապակցությամբ աղբյուրը անկեղծ տարակուսանք է հայտնել նման ակնհայտ ապատեղեկատվության փաստի առնչությամբ՝ այն անվանելով ծայրահեղ անտեղի և նույնիսկ անպատասխանատու։
Կոմպետենտ ու ճիշտ չէ քննարկել մոռացության մեջ գտնվող ԵԱՀԿ Մինսկի խմբի վերակենդանացման գաղափարը»,-գրում է ադրբեջանական քարոզչամեքենան։ Ակնհայտ է, որ Ալիևյան մամուլի հիմնական նպատակն է հանգստացնել սեփական հանրությանը, որ Մինսկի խմբի գործունեության հարցը, իբր, օրակարգից դուրս է։ ԱՄՆ Պետքարտուղարության հաղորդագրության մեջ, մասնավորապես, ասվում է,որ պետքարտուղարն ու նախագահ Ալիևը քննարկել են տարածաշրջանում խաղաղության հասնելու Ադրբեջանի և Հայաստանի պատմական հնարավորությունը։ «Պետքարտուղարը վերահաստատել է Միացյալ Նահանգների աջակցության առաջարկը՝ նպաստելու տարածաշրջանում տրանսպորտային և հաղորդակցության կապերի բացմանը:
Պետքարտուղար Բլինքենը խրախուսել է շարունակել երկկողմ երկխոսությունը, ինչպես օրինակ, վերջերս Թբիլիսիում կայացած Ադրբեջանի և Հայաստանի ԱԳ նախարարների հանդիպումը:
Բլինքենը նաև վերահաստատել է ԱՄՆ աջակցությունը ԵՄ միջնորդությամբ արդյունավետ քննարկումներին: Նա փոխանցել է, որ Միացյալ Նահանգները ԵԱՀԿ Մինսկի խմբի համանախագահն է 1994 թվականից և պատրաստ է երկկողմանի և համախոհ գործընկերների հետ ներգրավվել՝ օգնելու Հայաստանին և Ադրբեջանին գտնել երկարաժամկետ համապարփակ խաղաղություն։
Պետքարտուղար Բլինքենը նաև հորդորել է նախագահ Ալիևին ազատ արձակել մնացած հայ ձերբակալվածներին»,-ասվում է հաղորդագրությունում։
factor.am