Զառանցանք է․ Պուտինը՝ «Հյուսիսային հոսքը»որպես էներգետիկ զենք օգտագործելու մասին
Ռուսաստանի նախագահ Վլադիմիր Պուտինն անհեթեթություն է անվանել ՌԴ-ի հասցեին մեղադրանքները՝ «Հյուսիսային հոսք» գազատարը որպես էներգետիկ զենք օգտագործելու վերաբերյալ։ Այս մասին նա հայտարարել է` ելույթ ունենալով Վլադիվոստոկում Արևելյան տնտեսական համաժողովի լիագումար նիստում։««Հյուսիսային հոսք 1-ը» հիմա փաստացի փակ է։ Բոլորն ասում են․«Այ, Ռուսաստանն էներգետիկ զենք է օգտագործում»։ Հերթական անհեթեթությունն է և զառանցանքը։ Մենք ի՞նչ զենք ենք օգտագործում։ Մենք որքան պետք է՝ մատակարարում ենք մեր գործընկերներին․որքան հայտը ներկայացնում են, այդքան էլ կատարում ենք։ Մենք հո ինչ-որ տեղ օդ չենք մատակարարում, այլ հայտերով։ Հայտը եկել է՝ կատարում ենք»,-ասել է նա։
Ռուսաստանի ղեկավարի խոսքով՝ Լեհաստանն ու Ուկրաինան ինքնուրույն փակել են գազամուղը, դա նրանց որոշումն է։
«Ինչ է տեղի ունեցել․Ուկրաինայով անցնող գազատարի երկու գիծ կա, Ուկրաինան վերցրել և իր նախաձեռնությամբ փակել է մի գիծը՝ դրա վրա վերահսկողության բացակայության մտացածին պատրվակով։ Իրենք են փակել։ «Յամալ-Եվրոպա» երկրորդ խողովակաշարային համակարգն անցնում է Լեհաստանով, Լեհաստանը վերցրել ու պատժամիջոցներ է դրել այդ գազատարի վրա։ Մե՞նք ենք դա արել, ինչ է։ Լեհերն են փակել»,-ընդգծել է ՌԴ նախագահը։
Արևելյան տնտեսական համաժողովն անցկացվում է սեպտեմբերի 5-8-ը, Հեռավոր Արևելքի դաշնային համալսարանի՝ Վլադիվոստոկի Ռուսսկի կղզում գտնվող մասնաշենքում։
