Սնիգիրյովկա քաղաքում բարձրացվել է Ուկրաինայի դրոշը ․ քաղաքը կարևոր պաշտպանական գիծ էր ռուս զինվորականների համար
Ուկրաինական ուժերը վերականգնել են վերահսկողությունը Նիկոլաևի շրջանի Սնիգիրյովկա բնակավայրի նկատմամբ։ «Սնիգիրյովկան Ուկրաինա է»,- ասվում է Ուկրաինայի Զինված ուժերի Telegram-ալիքի հաղորդագրության մեջ։ Հաղորդագրությանը կից կադրեր են հրապարակվել, որոնք ցույց են տալիս, որ քաղաքում բարձրացվել է Ուկրաինայի դրոշը։
Ուկրաինայի վերահսկողությանը Սնիգիրյովկայի վերադարձի մասին լուրը ինքնատիպ կերպով հաստատել է նախագահի աշխատակազմի ղեկավար Անդրեյ Երմակը, որն իր Telegram ալիքում թռչնի էմոջի է հրապարակել, գրում է BBC-ի ռուսական ծառայսւթյունը։ Սնիգիրյովկայի անցումն ուկրաինացի զինվորականների վերահսկողությանը կարևոր է, քանի որ այն հնարավորություն է բացում Ուկրաինայի զինված ուժերի առաջխաղացման համար դեպի Խերսոն։
Հիշեցնենք, որ նախօրեին Ռուսաստանի իշխանությունները հայտարարել էին իրենց զինվորականներին օկուպացված Խերսոնի տարածքից դուրս բերելու մասին։