Լավրովը Բայրամովին կոչ է արել Լաչինի միջանցքով երթևեկությունը շուտափույթ ապաշրջափակել
Ռուսաստանի արտաքին գործերի նախարար Սերգեյ Լավրովը Ադրբեջանի ԱԳ նախարար Ջեյհուն Բայրամովի հետ զրույցում կոչ է արել Լաչինի միջանցքով երթևեկությունը շուտափույթ ապաշրջափակել, հայտնել են ՌԴ ԱԳՆ-ում:«Նախարարները քննարկել են երկկողմ և տարածաշրջանային օրակարգի մի շարք արդիական թեմաներ։ Ռուսական կողմից ընդգծվել է Լաչինի միջանցքով երթևեկության շուտափույթ ամբողջական ապաշրջափակման անհրաժեշտությունը՝ համաձայն 2020 թվականի նոյեմբերի 9 - ի բարձր մակարդակի եռակողմ հայտարարության մեջ ամրագրված պարամետրերի»,-ասված է ՌԴ ԱԳՆ կայքում հրապարակված հայտարարության մեջ։
Նշվում է, որ շեշտվել է նաև բոլոր հարակից հարցերի շուրջ փոխընդունելի լուծումների հանգելու կարևորությունը՝ Ռուսաստանի, Ադրբեջանի և Հայաստանի առաջնորդների պայմանավորվածությունների հիման վրա ադրբեջանա-հայկական կարգավորման առանցքային ուղիների շուրջ համալիր աշխատանքը վերսկսելու նպատակով։
