Բաքուն անհեթեթ է անվանել իրանական կողմի պնդումները՝ դեսպանատան վրա հարձակման պատճառների մասին
Ադրբեջանի փոխարտգործնախարար Խալաֆ Խալաֆովը հայտարարել է, որ Բաքուն մտադիր է համապատասխան միջազգային մեխանիզմներ կիրառել դիվանագիտական ներկայացուցչությունների դեմ ահաբեկչական հարձակումները հետաքննելու համար։ Ադրբեջանցի դիվանագետը նշել է.
«Իրանում Ադրբեջանի դեսպանատան աշխատանքը դադարեցնելու որոշումը չի ներառում Թավրիզում գլխավոր հյուպատոսության աշխատանքը»։
Խալաֆովը նաև կասկածի տակ է դրել իրանական կողմի պնդումները, որ հարձակումը եղել է ընտանեկան պատճառներով․ ադրբեջանցի արտգործնախարարը այն համարել է անհեթեթ։ «Որպես երկիր՝ Իրանը պատասխանատու է այս ահաբեկչական գործողության և դրա սարսափելի հետևանքների համար։ Բաքուն չի վստահում իրանական կողմին Ադրբեջանի դեսպանատան անվտանգության ապահովման հարցում»,- նշել է Խալաֆովը։
