Հայաստանը չի ներքաշվի Լաչինի միջանցքի բացման շուրջ բանակցություններին
Հայաստանը չի ներքաշվի Լաչինի միջանցքի բացման շուրջ բանակցություններին: Հայաստանի դիրքորոշումը շարունակում է մնալ այն, որ 2020 թվականի նոյեմբերի 9-ի հայտարարության համաձայն՝ Լաչինի միջանցքը պետք է հնարավորինս արագ բացվի, միջանցքը պետք է անխափան գործի և Հայաստանը այս գծին հավատարիմ է մնացել Մյունխենում և ցանկացած այլ վայրում։ Այս մասին «FactorTV»-ին տված հարցազրույցում ասել է ՀՀ անվտանգության խորհրդի քարտուղար Արմեն Գրիգորյանը։«Հայաստանը չի մտնում բանակցությունների մեջ կամ քննարկում, թե Լաչինի միջանցքը երբ կամ ինչպես պետք է քննարկվի»,- ասաց Գրիգորյանը:
Ինչ վերաբերում է ապաշրջափակմանը, ապա Գրիգորյանը նախ նշեց, որ ՀՀ-ն իր պարտավորությունները կատարել է, ապա հիշեցրեց, որ կառավարությունը նախապես որոշել էր Ադրբեջանի հետ սահմանին երեք անցակետերի գտնվելու վայրը, որտեղից կարող է տեղի ունենալ հաղորդակցության ապաշրջափակումը։
«Հայաստանը պատրաստ է ապաշրջափակմանը, սպասում ենք Բաքվի արձագանքին, բայց արտատարածքային ենթատեքստը չի քննարկվի, դա կարմիր գիծ է Հայաստանի համար։ Ալիևն ինքը վերջերս խոստովանեց, որ նոյեմբերի 9-ի հայտարարության համաձայն՝ Հայաստանի տարածքով միջանցքի մասին պայմանավորվածություն չկա։ Այսինքն՝ սա նրա հորինածն է, բայց նրա հռետորաբանությունը չի ազդել գործընթացների վրա և չի ազդի»,- նշել է Գրիգորյանը՝ հավելելով, որ նոյեմբերի 9-ի հայտարարության համաձայն՝ կա մեկ միջանցք, որը Լաչինի միջանցքն է։
