Ադրբեջանը հիստերիա է բարձրացրել, շարունակում է սպառնալ. Հակառակ դեպքում ստիպված կլինենք ձեռնարկել անհրաժեշտ միջոցներ՝ օգտագործելով բոլոր հնարավորությունները
Ադրբեջանի պաշտպանության նախարարությունը հերթական անգամ հիստերիա է բարձրացրել՝ սեփական մեղքը բարդելով հայկական կողմի վրա, խեղաթյուրելով իրականությունն ու այն ներկայացնելով սեփական կողմնակալ տեսանկյունից:Բաքվի հիստերիկ դրսևորումներն ավելի են ընդգծվել ՌԴ պաշտպանության նախարարության տեղեկագրի հրապարակումից հետո:
«Ռուսական կողմը խեղաթյուրել է փաստերը և կեղծ տեղեկություններ տարածել կիրակի օրը՝ մարտի 5-ին, Ստեփանակերտի ճանապարհին տեղի ունեցած զինված միջադեպի վերաբերյալ»,-ասվում է Ադրբեջանի պաշտպանության նախարարության հաղորդագրության մեջ։
Ադրբեջանի ՊՆ-ն կրկին առաջ տանելով իր սուտը հայտարարել է, թե մարտի 5-ին, օպերատիվ տեղեկատվության հիման վրա, Ադրբեջանի ԶՈւ ստորաբաժանումները փորձել են կանգնեցնել և ստուգել «Հայաստանից անօրինական ռազմական փոխադրումներ իրականացնող հայկական ավտոմեքենան»:
«Մոտենալով ավտոմեքենային՝ ադրբեջանական զինուժը ավտոմատից կրակոցներ է ստացել մեքենայում գտնվող հայկական զինված խմբի անդամների կողմից, ինչի հետևանքով ադրբեջանցի երկու զինծառայող է զոհվել, մեկը՝ վիրավորվել։ Պատասխան կրակի արդյունքում ապօրինի հայկական խմբի երեք անդամներ ոչնչացվել են, մեկը՝ վիրավորվել։ Զենքով և զինամթերքով լիովին զինված այս հայ զինծառայողներին բացահայտելը որպես «անձնագրային և վիզաների» ծառայություն իրականացնող ոստիկաններ ոչ այլ ինչ է, քան կեղծավորություն»,- իր կեղծ հաղորդագրությունը համեմել է Ադրբեջանի ՊՆ-ն։
Նշվում է, որ միջադեպից հետո վիրավոր ադրբեջանցի զինծառայողին չեն օգնել ռուս խաղաղապահները, տարածքից մահացածների և վիրավորների տարհանումն իրականացվել է ադրբեջանցի զինծառայողների կողմից։
Հաղորդագրության մեջ Բաքվի պաշտպանական գերատեսչությունը շարունակել է սպառնալ՝ նշելով.
«Եվս մեկ անգամ զգուշացնում ենք, որ Հայաստանի կողմից ռազմական բեռների փոխադրումը Ադրբեջանի տարածք, Հայաստանի զինված ուժերի անձնակազմի առաքումն ու ռոտացիան պետք է մեկընդմիշտ դադարեցվի, և հայկական զորքերը ամբողջությամբ դուրս բերվեն Ադրբեջանի տարածքից։ Հակառակ դեպքում ադրբեջանական կողմը ստիպված կլինի ձեռնարկել անհրաժեշտ միջոցներ հայկական ապօրինի զինված կազմավորումները զինաթափելու և վնասազերծելու համար՝ դրա համար օգտագործելով բոլոր հնարավորությունները»,- ասված է հաղորդագրության մեջ։
