Ստորագրելու ենք խաղաղության պայմանագիրը.Զորքերի հայելային հետքաշումն ինքնին չի կանխորոշում սահմանագծման աշխատանքները
«Ադրբեջանի հետ խաղաղության եւ հարաբերությունների հաստատման պայմանագրի շուրջ ինտենսիվ բանակցություններ են ընթանում եւ մենք հույս ունենք հնարավորինս արագ համաձայնության հասնել տեքստի շուրջ եւ ստորագրել այն: Միջազգային հանրության ընկալումը ավելի ու ավելի շատ է հակվում այն բանաձեւին, որ Հայաստանն ու Ադրբեջանը առանց վերապահումների պետք է ճանաչեն միմյանց համապատասխանաբար 29 800 քառակուսի կմ եւ 86 600 քառակուսի կմ տարածքային ամբողջականությունը եւ ԼՂ հայության իրավունքների ու անվտանգության ապահովման շուրջ Բաքվի եւ Ստեփանակերտի միջեւ պետք է տեղի ունենա երկխոսություն:Մենք համաձայն ենք այս տրամաբանությանը եւ բանակցությունները վարում ենք այս տրամաբանությամբ՝ ընդգծելով, որ Ստեփանակերտ-Բաքու երկխոսության երաշխավորման միջազգային մեխանիզմները չափազանց կարեւոր են: Միաժամանակ համոզված եմ, որ ՀՀ անվտանգության ապահովման ռազմավարական երաշխիքը խաղաղությունն է, որը հնարավոր է բոլոր հարեւանների հետ հարաբերությունները կարգավորելու միջոցով: Սա ամենեւին էլ հեշտ գործընթաց չէ, բայց կարծում եմ՝ այն է, ինչ ուզում եւ ակնկալում է մեր ժողովուրդը:
Տնտեսական եւ բյուջետային ցուցանիշները, կարծում եմ՝ հանրության եւ տնտեսության արձագանքն են մեր կառավարության որդեգրած խաղաղության օրակարգին»,-հայտարարեց Փաշինյանը:
Մեր դիրքորոշումն շարունակում է մնալ նույնը, մենք վերահաստատում ենք մեր մոտեցումը՝ 1975 թվականի ԽՍՀՄ գլխավոր շտաբի քարտեզներով արձանագրված սահմանագծից զորքերի հայելային հետքաշում, որը այս իրավիճակում կնշանակի կայունության ապահովում:
«Պիտի հոգունակությամբ արձանագրեմ, որ մենք այս խնդիրը տեսնում ենք ձեւակերպված նաեւ միջազգային հանրության կողմից, ինչը բավական կարեւոր է եւ ողջունելի»,-ասաց նա:
Անդրադառնալով Ադրբեջանի դիրքորոշմանը, Փաշինյանն ասաց. «Ադրբեջանի դիրքորոշման տեղաշարժ չեմ կարող արձանագրել, միաժամանակ ընդգծելով, որ կոնկրետ սահմանային անվտանգության ապահովումը բանակցային գործընթացի կարեւորագույն մաս է:
Ոչ մի գաղտնիք չկա, որ Ադրբեջանը շարունակում է վարել ռազմական ճնշման քաղաքականություն՝ փորձելով ռազմական ճնշման միջոցով ավելի նպաստավոր պայմաններ ստանալ բանակցությունների ընթացքում: Միաժամանակ պիտի արձանագրեմ, որ դա միջազգայնորեն ստանձնած պարտավորության խախտում է, որովհետեւ 2022-ի հոկտեմբերի 31-ի Սոչիի հանդիպման արդյունքներով ընթանված հայտարարության մեջ կողմերը պարտավորվել են ուժի կամ ուժի սպառնալիքի գործադրումից: Մենք պետք է շարունակենք մեր աշխատանքը:
Ուզում եմ նաեւ ընդգծել, որ զորքերի հայելային հետքաշումը ինքնին չի կանխորոշում սահմանագծման աշխատանքները: Դա առանձին գործընթաց է, սա ընդամենը սահմանային իրադրության կայունությունն ապահովելու մասին է:
Չնայած նաեւ կարծում ենք, որ 1975-ի քարտեզը կարող է եւ պետք է հիմք հանդիսանա նաեւ հետագա սահմանագծման աշխատանքների համար, որովհետեւ դա է ենթադրում 2022-ի հոկտեմբերի 6-ի Պրահայում ձեռք բերված պայմանավորվածությունները՝ Ալա Աթայի հռչակագրի հիման վրա սահմանազատում իրականացնելու վերաբերյալ»,-ընդգծեց վարչապետը:
