Դեմարկացիայից հետո քարտեզների հիման վրա զորքերի հետքաշում կլինի երկու կողմից էլ
ՀՀ ԱԺ նախագահ Ալեն Սիմոնյանը հայտարարել է, որ Հայաստանի սուվերեն տարածքներից ադրբեջանական զորքերի դուրսբերումը կիրականացվի դելիմիտացիայի և դեմարկացիայի գործընթացի ավարտից հետո:«Բնականաբար, զորքերի հետքաշում կլինի։ Այն տարածքները, որոնք դեմարկացիայից ու դելիմիտացիայից հետո և քարտեզների հիման վրա լինելու են Հայաստանի տարածք, ադրբեջանական զորքերը պետք է լքեն, և հակառակը», - լրագրողների հետ զրույցում ասաց Սիմոնյանը։
Միևնույն ժամանակ, Սիմոնյանը չի պատասխանել այն հարցին, թե արդյոք զորքերի դուրսբերումը նախապայման կդառնա Ադրբեջանի հետ խաղաղության պայմանագրի ստորագրման համար: «Նախապայման» եզրույթի օգտագործումն իմ կողմից սխալ կլիներ։ Հենց հիմա քննարկվում են այն կետերը, որոնք կարևոր են կողմերի համար։ Այս հարցերը (զորքերի դուրսբերումը Հայաստանի տարածքից, միջազգային երաշխիքների առկայությունը և Ստեփանակերտի հետ երկխոսության սկիզբը) Հայաստանի համար շատ կարևոր են։ Արդյոք նրանց որոշումը կներառվի պայմանագրում, թե դրանք կլուծվեն ինչ-որ այլ ակտի միջոցով, ես չեմ կարող ասել», - հայտարարեց Սիմոնյանը։
Բանախոսը վստահեցրեց, որ բացառված է խաղաղության պայմանագրի ստորագրման հնարավորությունը, որը հաշվի չէր առնի Հայաստանի տարածքային ամբողջականությունը 29,8 հազար քառ.կմ սահմաններում և ոչ պակաս:
