Տեսանյութ,ԼՂ-ի ինքնավար մարզ լինելու փաստը պետք է դրվի բանակցային սեղանին,միջազգային հանրությունը նույնիսկ Ադրբեջանին կստիպի, որ այս հարցը մտնի օրակարգ
Նախկին ԱԳ նախարար Վարդան Օսկանյանը կրկնել է օրերս Նիկոլ Փաշինյանին արած առաջարկը։Նա ֆեյսբուքյան ուղիղ եթերում ներկայացրել է այն այլընտրանքը, որը կարող է լինել Լեռնային Ղարաբաղի հարցում Հայաստանի այսօրվա իշխանությունների քաղաքականությանը։
Օսկանյանի դիտարկմամբ՝ նախ պետք է ընդլայնել բանակցային օրակարգը, քանի որ, ըստ նրա, բանակցային օրակարգում հայկական պահանջ չկա, կան ադրբեջանական պահանջներ։
«Բանակցային գործընթացքում պետք է ներառել Արցախի ինքնավար մարզ լինելու հանգամանքը, սա շատ կարևոր է, և սրա վրա պետք է շեշտը դնել։ Սա է, որ կարող է կտրուկ փոփոխություններ մտցնել բանակցային տրամաբանության մեջ և նոր հնարավորություններ կտա հայանպաստ լուծման համար։ 1991 թվականին հնարավորություն է տվել Արցախի ժողովրդին ձգտելու ինքնորոշման, սա ընկալելի դարձավ միջազգային հանրության համար, որովհետև Արցախը ուներ ինքնավար մարզի կարգավիճակ։ Սա պետք է բերել բանակցային գործընթաց և արդյունք կտա, ես համոզված եմ դրանում 100 տոկոս»,-համոզմունք հայտնեց դիվանագետը։
Ըստ նրա՝ իր մատնանշած տարբերակը միջազգային ընդունված գործընթաց է և միջազգային հանրությունը կնպաստի, որ այս հարցը լուծվի։
«Միջազգային հանրությունը նույնիսկ Ադրբեջանին կստիպի, որ այս հարցը մտնի օրակարգ, իսկ, եթե Ադրբեջանը դիմադրի, միջազգային իրավունքի տեսանկյունից լուրջ խնդիրների առաջ է կանգնելու և դա ստիպելու է ադրբեջանական կողմին, վերջիվերջո, ընդունել, որ Արցախի ժողովուրդն իրավունք ունի արտաքին ինքնորոշման»,– բացատրեց նա։
Հիշեցնենք, որ ԱԳ նախկին նախարար Վարդան Օսկանյանը հանդես էր եկել առաջարով և պատասխանատվությամբ հայտարարել, որ, եթե լիազորություն տրվի իրեն, և մի խումբ դիվանագետների, ապա ինքը կարող է շատ կարճ ժամանակում՝ 2-3 ամսվա ընթացքում կտրուկ փոփոխություններ մտցնել բանակցային գործընթացում ի շահ Հայաստանի։
Բայց Օսկանյանը նախապայման է ներկայացրել այս հարցում, որ այդ լիազորությունը պետք է լինի 100 տոկոս, Փաշինյանը 3 ամիս պետք է լռի։
