Իրավիճակը գնալով վատթարանում է. անհանգստացած ենք ԼՂ-ում հրադադարի ռեժիմի հաճախակի խախտումներով

Ռուսաստանի Դաշնությունը չափազանց անհանգստացած է Լեռնային Ղարաբաղում հրադադարի ռեժիմի հաճախակի խախտումներով և Լաչինի միջանցքի շարունակվող շրջափակմամբ, այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Մենք մեր ծայրահեղ մտահոգությունն ենք հայտնում Լեռնային Ղարաբաղում հրադադարի ռեժիմի խախտման դեպքերի և Լաչինի միջանցքի շարունակվող շրջափակման առնչությամբ: Առկա տեղեկատվության համաձայն՝ տարածաշրջանում հումանիտար իրավիճակը գնալով վատթարանում է: Ցավով պետք է արձանագրենք, որ մատակարարումների կրճատման դեպքում Ղարաբաղի բնակչությունը կարող է մնալ առանց սննդամթերքի, առաջին անհրաժեշտության ապրանքների և դեղամիջոցների պաշարների», - ասել է դիվանագետը։

Նա նշել է, որ ռուս խաղաղապահների գործողությունները Ղարաբաղում կհամապատասխանեն տեղում իրավիճակի զարգացմանը և եռակողմ պայմանավորվածություններին։

«Մենք կոչ ենք անում Բաքվին և Երևանին բոլոր հարցերը լուծել բացառապես քաղաքական և դիվանագիտական ճանապարհով: Կոչ ենք անում ադրբեջանական կողմին ապաշրջափակել Լաչինի միջանցքը, ապահովել քաղաքացիների, տրանսպորտային միջոցների և բեռների անարգել տեղաշարժը», - ասել է ՌԴ ԱԳՆ պաշտոնական ներկայացուցիչ Մարիա Զախարովան։

Նրա խոսքով՝ Ռուսաստանը կապ է պահպանում հայկական և ադրբեջանական կողմերի հետ՝ տարածաշրջանում իրավիճակը դեէսկալացնելու նպատակով։ Այդ շփումները, դիվանագետի խոսքով, շարունակվում են ինչպես քաղաքական մակարդակով, այնպես էլ խաղաղապահ կոնտինգենտի միջոցով։

«Եվ, իհարկե, շատ բան կախված է հենց կողմերից, նրանց քաղաքական կամքից և միմյանց կես ճանապարհին հանդիպելու պատրաստակամությունից: Մեր կողմից մենք գործադրում ենք բոլոր անհրաժեշտ ջանքերը», - վստահեցրել է Զախարովան:

Զախարովան ասել է նաև, որ Ռուսաստանի արտգործնախարարի հատուկ ներկայացուցիչ Խովաևը շուտով կայցելի տարածաշրջան։