Թովմասյանն այստեղ էլ է թերացել․Բա կարտոֆիլի դեպքին արձագանքել է, ազգին «ոչխար» անվանելուն չի արձագանքել
Հանձնաժողովի նախագահը ունի շատ լուրջ լիազորություններ և դրա համար ստանում է էական հավելյալ աշխատավարձ, քան շարքային պատգամավորները: Այս մասին այսօր լրագրողների հետ զրույցում ասաց «Քաղաքացիական պայմանագիր» խմբակցության պատգամավոր Հովիկ Աղազարյանը՝ խոսելով Թագուհի Թովմասյանին ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնից զրկելու պատճառների մասին:«Եթե մեր հիմնավորումները լինեին անհիմն, կարող էր խնդիր լինել, բայց եթե հիմնավորումները կան, փաստացի արձանագրված են, ապա խնդիր չեմ տեսնում: Թովմասյանը հայտնի նիստի ժամանակ չի զսպել մարդու իրավունքների պաշտպանի ընդդիմության թեկնածու Էդգար Ղազարյանին և որևէ կարծիք չի հայտնել նրա՝ ՀՀ քաղաքացիների մեծ մասի հասցեին հնչեցրած վիրավորանքներին»,- ասաց Աղազարյանը:
Լրագրողի դիտարկմանը, թե ինքը քաղաքացու կարտոֆիլը թափել է, իր վարքն ինչպե՞ս է գնահատում, ԱԺ պատգամավորը արձագանքեց:
«Տեսնում եք՝ Թագուհի Թովմասյանը այստեղ էլ է թերացել և չի պաշտպանել ձեր ասած կարտոշկա վաճառողի իրավունքները»,- ասաց Աղազարյանը, որին լրագրողները հակադարձեցին, որ Թովմասյանը խոսել է դեպքի մասին. «Բա կարտոֆիլի դեպքին արձագանքել է, ընդդիմության կողմից առաջադրվող պաշտպանության և անվտանգության հանձնաժողովի թեկնածուի՝ ազգին «ոչխար» անվանելուն չի արձագանքել»:
Աղազարյանը նաև նկատեց՝ թեկնածու ներկայացնելը քվոտայով պատկանում է ընդդիմությանը, հետևաբար նրանք պետք է ներկայացնեն հաջորդ թեկնածուին, իսկ հանձնաժողովի աշխատանքները, անկախ ամեն ինչից, կազմակերպվում են:
