Տեսանյութ. Կարճ ու լակոնիկ պատասխան՝ եթե Արցախում հայերին սկսեն մորթել, ի՞նչ ես անելու, պատասխանում է՝ ոչինչ, այնտեղ կա ՊԲ
Փաշինյանը երեկ ասուլիսում ասում էր, որ միջազգային հանրություն ուզում է լուծել ԼՂ հակամարտությունը եւ ելքն այդքան էլ էական չէ. այո, աշխարհն, ինչ խոսք, ուզում է կարգավորել այդ հակամարտությունը եւ բնականաբար, գնալու է ամենափոքր դիմադրության ճանապարհով: Այս մասին, այսօր՝ հուլիսի 26-ին, մամուլի ասուլիսի ժամանակ նշեց ԱԺ «Պատիվ ունեմ» խմբակցության ղեկավար, ՀՀԿ անդամ Հայկ Մամիջանյանը:«Այդպես գործում է ցանկացած միջնորդական առաքելություն: 2018-ից սկսած այդ թույլ դիմադրողականության ուղղությունը եղել է Հայաստանի հիմնական բանակլցողը: Այս է պատճառը, որ զիջումը զիջումի հետեւից ենք արձանագրում ԼՂ հակամարտության կարգավորման հարցում: Որովհետեւ մի կողմը շարունակում է դիմադրել, իսկ մյուս կողմը պատրաստ է ստորագրել ամեն ինչի տակ, պատրաստ է համաձայնել ամեն ինչի, մենակ թե սեփական իշխանությունը պահպանի»:
Մամիջանյանն անդրադարձավ նաեւ Նիկոլ Փաշինյանի հայտարարություններին՝ Արցախում հնարավոր ռազմական գործողությունների պարագայում Հայաստանի գործողությունների վերաբերյալ. «Պատերազմ ոչ ոք չի ուզում: Փորձել մեր արժանապատիվ գոյության պահանջները ներկայացնել որպես պատերազմի քարոզ, սովորական սրիկայություն է: Բայց ինչպե՞ս եք պատկերացնում երկրի ղեկավար, որին հարց են տալիս՝ եթե քո հայրենակիցներին սկսեն մորթել, ի՞նչ ես անելու, պատասխանում է՝ ոչինչ, այնտեղ կա Պաշտպանության բանակ: Դա է ասել Փաշինյանը երեկ: Նա կանաչ լույս է վառել Ադրբեջանի ռջեւ՝ Արցախի նկատմամբ հերթական ագրեսիան իրականացնելու համար»,-ասաց ընդդիմադիր պատգամավորը:
