ԱՄՆ-ում տղամարդը մուսուլմանների հանդեպ ատելության ֆոնին սպանել է 6-ամյա պաղեստինցի տղային և ծանր վիրավորել 32-ամյա մորը
ԱՄՆ Իլինոյսի նահանգում մահմեդականների հանդեպ ատելության ֆոնին 71-ամյա Ջոզեֆ Չուբան դանակի հարվածով սպանել է 6-ամյա տղային և ծանր վիրավորել 32-ամյա մորը։Իշխանությունները 71-ամյա հարձակվողին մեղադրանք են առաջադրել ատելության հիմքով հանցագործության մեջ։ Նշվում է, որ տղամարդը հարձակումն իրականացրել է նաև պաղեստինա-իսրայելական հակամարտության սրացման պատճառով։
ԱՄՆ նախագահ Ջո Բայդենը հայտարարել է, որ իսլամաֆոբիան ԱՄՆ-ում անընդունելի է՝ հաշվի առնելով այս դեպքը։
Բայդենն ընդգծել է, որ ինքը «ցնցված և ապշած է վեցամյա երեխայի դաժան սպանությունից և նրա մոր սպանության փորձից» նաև հայտնել, որ խոսքը ԱՄՆ տեղափոխված պաղեստինցի մահմեդականների մասին է։ Ինչպես ընդգծել է Բայդենը, «ամերիկացիները պետք է միասին կանգնեն՝ մերժելու իսլամաֆոբիան, ինչպես նաև այլատյացությունը՝ իր բոլոր ձևերով»:
«Ես բազմիցս ասել եմ, որ չեմ լռելու ատելության առաջ»,- ասել է ԱՄՆ նախագահը։ «Ամերիկայում տեղ չկա որևէ մեկի նկատմամբ ատելության համար»,- հավելել է նա։
