Հոգեսոցիալական կարգավորման կենտրոնն արդեն 10 տարեկան է
Հոգեսոցիալական կարգավորման կենտրոնը հիմնադրվել է 2014թ-ին: Այսօր լրանում է կենտրոնի հիմնադրման 10 տարին:Լինելով իր տեսակի մեջ միակը Հայաստանում՝ Հոգեսոցիալական կարգավորման կենտրոնը իր մեծ ներդրումն ունի հոգեկան առողջության պահպանման և բարելավման գործում:
Կենտրոնի գործունեության հիմքում ընկած է բազմաթիվ երկրների փորձը և հայաստանյան իրականության համադրությունը, ինչը հնարավորություն է տալիս կիրառել հոգեկան առողջության հիմնախնդիրների կարգավորման լավագույն մոդելը:
Հոգեսոցիալական կարգավորման կենտրոնը ծառայություններ է մատուցում հոգեկան առողջության բոլոր տեսակի խնդիրների դեպքում:
Կենտրոնը նաև զբաղվում է հոգեկան խանգարումների առկայության դեպքում հոգեսոցիալական կարգավորմամբ՝ ներառյալ հոգեբանական, սոցիալական, իրավական օգնություն և այլ, տարբեր տեսակի խնդիրների լուծմամբ:
Ինչպես նաև կենտրոնը համագործակցում է բժշկական, այդ թվում հոգեբուժական օգնություն ցուցաբերող հանրապետության առաջատար կազմակերպությունների հետ և ըստ անհրաժեշտության կարող է տվյալ կազմակերպություններում ապահովել բարձրակարգ բժշկական, այդ թվում նաև հոգեբուժական օգնություն: Ըստ անհրաժեշտության, այս գործում Կենտրոնը կարող է բուժող բժշկի համար ապահովել մասնագիտական խորհրդատվություն արտասահմանյան առաջատար կլինիկաներում աշխատող և կենտրոնի հետ համագործակցող, համաշխարհային ճանաչում ունեցող մասնագետների կողմից:
Հոգեսոցիալական կարգավորման կենտրոնի կարգախոսն է. «Ցանկացած խնդիր միշտ ունի լուծում և մենք կօգնենք ձեզ այդ գործում»:
Հոգեսոցիալական կարգավորման կենտրոնի ղեկավարն է Համաշխարհային հոգեբուժական ասոցիացիայի վաստակավոր անդամ, Համաշխարհային հոգեբուժական ասոցիացիայի Գործադիր վարչության անդամ՝ Գիտական սեկցիաների քարտուղար, Հայկական հոգեբուժական ասոցիացիայի նախագահ, ԵՊԲՀ հոգեբուժության ամբիոնի դոցենտ, բ․գ․թ․ Արմեն Սողոյանը:
Hayacq.com-ը շնորհավորում է Հոգեսոցիալական կարգավորման կենտրոնին, ղեկավար Արմեն Սողոյանին և աշխատակազմին՝ մաղթելով նորանոր նվաճումներ, ձեռքբերումներ և վերելքներ:
