Նոր ավտոբուսները մենք մեր հարկերով ենք գնել, նույն գազելների վիճակն է, կիլկաների նման լցված գնում ենք, ձրիակերներին թույլ չենք տալու մտնեն մեր գրպանը
Արդեն մի քանի օր է շարունակվում է տրանսպորտի թանկացման դեմ բողոքի ակցիաները:100 դրամ եմ վճարել ու շարունակելու եմ այդպես վճարել, երբեք 150 դրամ չեմ վճարելու: Այս մասին լրագրողների հետ զրույցում ասաց տրանսպորտի թանկացման դեմ բոյկոտող քաղաքացիներից մեկը:
«Չեմ պատրաստվում 150 դրամ վճարել: Այդ նոր ավտոբուսները մենք մեր հարկերով ենք գնել, թող այդ 150 դրամն իրենք իրենց պարգևավճարներից վճարեն: Ամեն ինչի գինը բարձրացել է, ինչ-որ մեկի աշխատավարձը բարձրացրե՞լ են՝ թեկուզ այդ 50 դրամը վճարելու համար»,- ասաց նա:
Դեմ եմ տրանսպորտի թանկացմանը և բոյկոտում եմ: Այս մասին լրագրողների հետ զրույցում ասաց տրանսպորտից օգտվող մեկ այլ քաղաքացի:
«Բարոյազուրկ քաղաքային իշխանություն ունենք այսօր: Այսօր բաց եմ թողել մի քանի տրանսպրոտ ու այսօր ուշ եմ գնում աշխատանքի, նույն գազելների վիճակը չէ՞, ոնց որ կիլկաներ լինենք, չենք կարողանում շնչել:
Եթե 3-4 րոպեն մեկ տրանսպորտը գա, այդքան չեն լցվի: Ինչով են իրենք բացատրում այդ թանկությունը, ներկայացրե՞լ են որևէ հաշվարկ, համոզված եմ, որ բացարձակ տեղյակ էլ չեն ինքնարժեքից: Այսօրվա 100 դրամը ծով է, բայց քանի որ գիտեն՝ մի տարուց դուրս են թռնելու, դրա համար էլ ուզում են հնարավորինս մտնեն մեր գրպանները ձրիակերները, բայց թույլ չենք տալու»,- ասաց նա:
