Չինաստանն առաջարկել է կազմակերպել Պուտին-Թրամփ հանդիպումը
Չինացի պաշտոնյաներն առաջարկ են ուղարկել ԱՄՆ՝ Ռուսաստանի և ԱՄՆ նախագահներ Վլադիմիր Պուտինի և Դոնալդ Թրամփի հանդիպումն իրենց տարածքում անցկացնելու վերաբերյալ, գրում է The Wall Street Journal-ը՝ հղում անելով Պեկինի և Վաշինգտոնի աղբյուրներին։ Միևնույն ժամանակ, ինչպես նշում է թերթը, Ուկրաինայի նախագահ Վլադիմիր Զելենսկու մասնակցությունը հանդիպմանը չի սպասվում։Հանդիպման կազմակերպումից բացի, Պեկինը պատրաստակամություն է հայտնել հնարավոր հրադադարից հետո նպաստել խաղաղապահ ջանքերին։ Առաջարկում, մասնավորապես, նշվում է Չինաստանի երաշխավորի դերը և խաղաղապահներ ուղարկելու պատրաստակամությունը։
Չինաստանը միջնորդական առաքելությամբ շահագրգռված է՝ Թրամփի հետ մաքսային տուրքերի թեմայի շուրջ կապ հաստատելու համար, բացատրում է WSJ-ը։ Ըստ թերթի աղբյուրների՝ Չինաստանի ղեկավար Սի Ծինփինը չի ցանկանում, որ հակամարտության կարգավորման հարցում որևէ օգնություն սպառնալիք դառնա Մոսկվայի և Պեկինի սերտ հարաբերությունների համար։ Չինաստանի նախաձեռնությունը չի ներառում Մոսկվային տնտեսական աջակցությունը նվազեցնելու որևէ պարտավորություն։
Նախօրեին՝ փետրվարի 12-ին, հեռախոսազրույց է տեղի ունեցել Պուտինի և Թրամփի միջև։ ՌԴ նախագահի մամուլի քարտուղար Դմիտրի Պեսկովը հայտնել է, որ կողմերը պայմանավորվել են անձնական հանդիպում կազմակերպել։ Կրեմլի ներկայացուցչի խոսքով՝ Պուտիnn ԱՄՆ նախագահին հրավիրել է Մոսկվա։ Թրամփը, խոսելով հնարավոր հանդիպման մասին, նշել է, որ այն տեղի կունենա «ոչ հեռու ապագայում»։
