Երևանի ավագանիում ընդունվել է նոր համայնքային հիմնարկ ստեղծելու նախագիծը
Երևանի ավագանիում ընդունվել է նոր համայնքային հիմնարկ ստեղծելու նախագիծը։ Հիմնարկը կրելու է «Երևանի երթևեկության կառավարման կենտրոն» անվանումը։Նախագծի հիմնավորմամբ՝ մայրաքաղաքում ավտոմեքենաների թվի շարունակական աճը, ճանապարհային ծանրաբեռնվածության մեծացումը, ինչպես նաև հանրային տրանսպորտի բարեփոխումների ընթացքը պահանջում են ավելի համակարգված և միասնական մոտեցում երթևեկության կառավարման ու պլանավորման ոլորտում։
Նոր հիմնարկը կունենա մի շարք առանցքային գործառույթներ, այդ թվում՝
ճանապարհային ենթակառուցվածքների արդյունավետ շահագործման և զարգացման պլանավորում,
երթևեկության հոսքերի մշտադիտարկում, վերլուծություն և մոնիթորինգ,
լուսացույցային կառավարման, ճանապարհային նշանների և գծանշումների միասնական քաղաքականության մշակում,
երթևեկության անվտանգության բարձրացման ծրագրերի իրականացում,
քաղաքային տրանսպորտի երթևեկության համակարգում,
ժամանակակից թվային լուծումների ներդրում և սպասարկում։
Ըստ նախագծի՝ նոր կառուցվող կենտրոնի կանոնադրությունը, կառուցվածքը, աշխատակիցների թվաքանակը և հաստիքացուցակը սահմանվելու են որոշման հավելվածներում։ Քաղաքապետին էլ վստահվելու է հիմնարկը պետական ռեգիստրում գրանցելու գործնական կազմակերպումը։ Նոր կառույցը թույլ կտա իրականացնել ավելի ճկուն և արդյունավետ քաղաքականություն ճանապարհային երթևեկության ոլորտում՝ ապահովելով օպերատիվ արձագանք, միասնական համակարգում և ավելի բարձր մակարդակի անվտանգություն մայրաքաղաքում։
