Փաստաբան Էրիկ Ալեքսանյանը, դատավոր Արուսյակ Ալեքսանյանը մեղավոր են ճանաչվել
Հակակոռուպցիոն դատարանը՝ դատավոր Վահե Դոլմազյանի նախագահությամբ, հրապարակել է փաստաբան Էրիկ Ալեքսանյանի, լիազորությունները կասեցված դատավոր Արուսյակ Ալեքսանյանի, նրա օգնական Թամարա Գասպարյանի գործով վերդիկտը։Նրանք մեղավոր են ճանաչվել, բայց չեն ընդունել մեղադրանքն ի սկզբանե։
2022թ․ հոկտեմբերի 17-ին ԱԱԾ-ն ներխուժել էր դատարանի շենք ու ձերբակալել դատավոր Արուսյակ Ալեքսանյանին և փաստաբան Էրիկ Ալեքսանյանին։
Ըստ մեղադրանքի՝ դատարանը որոշել էր գրավի դիմաց ազատ արձակել հայտնի քրեական հեղինակություն համարվող Սերգեյ Գրիգորյանին («Ֆազ»)՝ բավարարելով նրա պաշտպան Էրիկ Ալեքսանյանի ներկայացրած միջնորդությունը։ ԱԱԾ-ն դատավորին մեղադրում է ակնհայտ անարդար դատական ակտ կայացնելու և պաշտոնեական լիազորություններն անցնելու մեջ։ Փաստաբան Էրիկ Ալեքսանյանը մեղադրվում է դատավոր Ալեքսանյանին պաշտոնեական լիազորություններն անցնելուն օժանդակելու մեջ։ Որպես օժանդակություն դիտարկվել է փաստաբան Էրիկ Ալեքսանյանի կողմից իր փաստաբանական լիազորություններից օգտվելը և իր պաշտպանյալի նկատմամբ ընտրված խափանման միջոց կալանավորումը վերացնելու, այլընտրանքային խափանման միջոցը թույլատրելի ճանաչելու վերաբերյալ միջնորդությունը։
