Ալավերդցի Վահագնից կաշառք ստացած քննչականի նախկին պետ Թաթուլ Շուշանյանը կրկին կկալանավորվի
ՀՀ հատուկ քննչական ծառայությունում քննվող քրեական գործով ՀՀ քրեական օրենսգրքի 311-րդ հոդվածի 4-րդ մասի 2-րդ կետի եւ 308-րդ հոդվածի 1-ին մասով որպես մեղադրյալ ներգրավված ՀՀ քննչական կոմիտեի Լոռու մարզային քննչական վարչության նախկին պետ Թաթուլ Շ.-ի նկատմամբ 07.02.2018թ.-ին որպես խափանման միջոց է կիրառվել կալանավորումը, որը 30.05.2018թ.-ին փոխարինվել էր այլընտրանքային խափանման միջոց գրավով:ՀՔԾ-ից հայտնում են, որ դատարանի հիշյալ որոշման դեմ դատավարական հսկողություն իրականացնող դատախազի կողմից վերաքննիչ բողոք էր բերվել:
Այսօր ՀՀ վերաքննիչ դատարանը բավարարել է դատախազի բողոքը եւ վերացրել այլընտրանքային խափանման միջոց գրավը: Թ. Շ.-ի նկատմամբ կրկին որպես խափանման միջոց է կիրառվել կալանավորումը:
Հիշեցնենք, որ Շուշանյանը մեղադրվում էր պաշտոնեական լիազորությունները չարաշահելու ու առանձնապես խոշոր չափերի կաշառք ստանալու համար։ Շուշանյանը զբաղեցրել է Լոռու մարզային քննչական վարչության պետի պաշտոնը, սակայն սկանդալային բացահայտումից հետո փետրվարի 6-ին Աղվան Հովսեփյանի հրամանով ազատվել է աշխատանքից եւ կալանավորվել:
Նշենք, որ ըստ մեղադրանքի՝ Շուշանյանը Ալավերդցի Վահագնից 5000 դոլար կաշառք է վերցրել:
