ԲՀԿ-ն կմիանա՞ Քոչարյանին
Բարգավաճ Հայաստան կուսակցությունը բացառում է, որ արտահերթ խորհրդարանական ընտրությունների ժամանակ կսատարի երկրորդ նախագահ Ռոբերտ Քոչարյանին: Այս մասին Lragir.am-ի հետ զրույցում ասաց ԱԺ Ծառուկյան դաշինք խմբակցության պատգամավոր Սերգեյ Բագրատյանը: «Բացառվում է, որ ԲՀԿ-ն միանա Քոչարյանին»,- նշեց Բագրատյանը:Անդրադառնալով Ռոբերտ Քոչարյանի այն առաջարկին, որ ինքը կարող է ընդդիմադիր բևեռի կենտրոն դառնալ, պատգամավորն ասաց, որ իրենք չկան այդ բևեռի ուժերի թվում: ԲՀԿ-ն, Սերգեյ Բագրատյանի խոսքով, այսօր իշխանության մաս է կազմում, որևէ այլ գործչի հետ, տվյալ դեպքում Ռոբերտ Քոչարյանի հետ համագործակցության որևէ օրակարգ չունի:
«Մենք հավատարիմ ենք մնում մեր մասնակցությանը կառավարությանը: Հավատարիմ ենք մնալու իշխանության հետ մեր պայմանավորվածություններին»,- ասաց նա:
Հարցին, թե խորհրդարանական ընտրություններից հետո՞ էլ է ԲՀԿ-ն այս նույն կարգավիճակով լինելու իշխանության կազմում, Բագրատյանը պատասխանեց, որ դա քննարկելու հարց է: «Մենք չենք կարող երկարատև հատվածի համար այսօր քննարկումներ անել, քանի որ առաջին հերթին չգիտենք իշխանության մոտեցումը: Մենք տեղյակ չենք, թե վարչապետն ու իր քաղաքական ուժն ինչպիսի մոտեցում ունեն խորհրդարանական ընտրություններից հետո: Բայց այս պահին, մինչև խորհրդարանական ընտրությունները մենք հավատարիմ ենք մնալու մեր կուրսին և աշխատելու ենք բացառապես կառավարության հետ»,- հավելեց նա:
Հարցին, թե հնարավո՞ր է ամիսներ անց, օրինակ, գարնանը, նախքան խորհրդարանական ընտրությունները ԲՀԿ-ում դիրքորոշումների փոփոխություն լինի, Սերգեյ Բագրատյանը պատասխանեց, որ հարցը ԲՀԿ-ում քննարկել են, բացառված է այդ տարբերակը: «Պարոն Ծառուկյանը հայտարարեց, դուք լսեցիք, որ չկա Քոչարյանի հետ համագործակցության օրակարգ»,- նշեց նա:
Սերգեյ Բագրատյանն անդրադարձավ նաև հարցին, թե ինչ հաջողություններ կարող է գրանցել հակահեղափոխությունը: «Ես բացառում եմ հակահեղափոխականությունը: Այլևս երբեք Հանրապետականի իշխանության վերադարձը չի լինելու՝ ցանկացած մոդիֆիկացիայով: Ես դա համարում եմ աբսուրդ ու անհնար բան»,- նշեց նա:
Այն, որ հակահեղափոխական ուժերը հույս են դնում այն գործոնի վրա, որ մինչև արևահերթ խորհրդարանական ընտրությունները հասարակությունը կարող է հիասթափվել Նիկոլ Փաշինյանից, Սերգեյ Բագրատյանը քիչ հավանական է համարում: Նա ասում է, որ կառավարության աշխատանքն անընդհատ պետք է զարգացնել, հատկապես տնտեսական զարգացումներին շատ մեծ ուշադրություն պետք է դարձնել:
«Ժողովրդական ալիքով ու զարթոնքով ձևավորված այսօրվա իշխանությունը կարող է շատ երկար ու մնայուն արժեքներ թողնել Հայաստանի Հանրապետությանը առնվազն առաջիկա 100 ամյակում: Ցանկացած հիասթափություն կարելի է կանխել՝ ճիշտ ներկայացնելով իրավիճակը: Եթե ժողովրդին անկեղծ ու ազնիվ ներկայացվի իրավիճակը, կարծում եմ, ժողովուրդը մեծ համախմբում ունի և կաջակցի իշխանություններին»,- նշեց նա:
Ըստ Բագրատյանի՝ այսօր այդ անկեղծությունը տեսնում է նոր իշխանությունների կողմից: Իսկ հետագայի համար տնտեսության զարգացմանը միտված կոնկրետ քայլեր պետք է լինեն, ժողովրդի համար տեսանելի առաջընթաց պետք է ապահովել, որ մարդիկ վստահ լինեն, որ աշխատավարձերի ու թոշակների բարձրացում կլինի, կյանքը կբարելավվի:
