Ֆեյսբուքյան գրառումների ուսումնասիրության, հրապարակված անհայտ ծագումնաբանության ձայնագրությունների հիման վրա 11 անձ է ձերբակալվել. ՔԿ-ի լուսանկարների թիրախում Սրբազանն է          Ադրբեջանը վերցրեց Ղարաբաղը, իսկ ի՞նչ է ուզում Հայաստանից. որքա՞ն ցավոտ են նրա այդ ցանկությունները հենց ՀՀ-ի համար       Այսպիսին կլինեն թյուրքական աշխարհի հեռանկարները՝ «Զանգեզուրի միջանցքի» իրականացման դեպքում.«Ենի Ազերբայջան»    

10 սեպ 2018 11:12

Ե՞րբ գործատուն կարող է աշխատանքից հեռացնել աշխատողին.ԲՀԿ-ՀՀԿ հակասությունները ԱԺ-ում

Ե՞րբ գործատուն կարող է աշխատանքից հեռացնել աշխատողին.ԲՀԿ-ՀՀԿ հակասությունները ԱԺ-ումԱզգային ժողովն այսօր սկսեց 6-րդ գումարման 4-րդ նստաշրջանի աշխատանքները։ Նստաշրջանը մեկնարկեց ԲՀԿ-ՀՀԿ հակասություններով։
«Ծառուկյան» դաշինքի անդամներն առաջարկում են փոփոխություններ կատարել ՀՀ Աշխատանքային օրենսգրքում` այն հիմնավորմամբ, որ ներկա օրենքն իրավունք է տալիս գործատուին միանձնյա որոշում կայացնել աշխատողին աշխատանքից հեռացնելու մասին։
Առաջարկվող նախագիծը ներկայացնելով` «Ծառուկյան» խմբակցության պատգամավոր Գևորգ Պետրոսյանը նշեց, որ օրենքի որոշ դրույթներ գործատուին իրավունք են տալիս «աշխատանքից հեռացնել արձակուրդում գտնվող, գործուղման մեջ գտնվող, ժամանակավոր անաշխատունակ համարվող մարդուն` առանց նրա համաձայնության»։ Բացի այդ, նրա դիտարկմամբ գործատուն կարող է առանց գրավոր բացատրության աշխատողին հեռացնել աշխատանքից, եթե վերջինը մեկ ամբողջ օր աշխատանքի չի ներկայացել։
Պետրոսյանի համոզմամբ` այս դրույթները ոտնահարում են աշխատողի իրավունքները։ Մեկ այլ դրույթ էլ, նրա խոսքով, վնասում է աշխատողի շահերը։ Խոսքը աշխատողի` աշխատանքի ներկայանալու, բայց աշխատանքային պարտականությունները միտումնավոր կերպով չկատարելու դեպքերի մասին է։ Այս դեպքում, նախագծի հեղինակների կարծիքով, գործատուն աշխատողին պատժելու ավելի լայն իրավասություններ պետք է ունենա։
«Աշխատանքային օրենսգրքի 37-րդ հոդվածն ուղղակի սահմանում է, որ և՛ աշխատողները, և՛ գործատուները պարտավոր են իրենց իրավունքներից օգտվել բարեխղճորեն, պարտականությունները կատարել օրինական, ողջամիտ կերպով»,- իր ելույթն ավարտելով` նշեց Պետրոսյանը։
ԱԺ առողջապահության եւ սոցիալական հարցերի մշտական հանձնաժողովի նախագահ, ՀՀԿ խմբակցության պատգամավոր Հակոբ Հակոբյանն իր ելույթում նշեց, որ հանձնաժողովը համաձայն չէ առաջարկվող փոփոխությունների հետ։
Նրա համոզմամբ` դրանք հղի են վտանգներով, քանի որ եթե նշված հոդվածը վերաբերի միայն գործատուին, ապա գործատուն կարող է առանց աշխատողի համաձայնությունը ստանալու միանձնյա որոշումներ կայացնել։
«Եթե մենք այս նորմն ընդունում ենք, գործատուն կարող է աշխատողին կանչել ու ասել` ընդմիջման ժամը փոխում եմ 5-6-ը` 1-2-ի փոխարեն, աշխատանքի սկիզբն էլ փոխում եմ առավոտյան ժամը 5-ը։ Ուզում ես` արի, չես ուզում` մի արի, քո գործն է։ Եթե այս նորմը փոխում ենք, գործատուին իրավունք ենք տալիս ասելու` չես ուզում, թող գնա»,- ասաց Հակոբյանը` հավելելով, որ հատկապես մասնավոր սեկտորի, ՓՄՁ ոլորտի համար այս փոփոխությունը շատ վտանգավոր է։
Միաժամանակ Հակոբյանը հիշեցրեց, որ օրենքը նախատեսում է աշխատողին աշխատանքից հեռացնելուց առաջ նրանից երկու անգամ գրավոր բացատրություն պահանջել և միայն երրորդ անգամ նույն խախտումն անհարգելի կերպով կրկնվելու դեպքում նրան հեռացնել աշխատանքից։
Հակոբյանը նշեց, որ հանձնաժողովը բացասական կարծիք է տվել ներկայացված փոփոխությունների առաջարկներին։ Բայց ՀՀԿ խմբակցության ղեկավար Վահրամ Բաղդասարյանը հայտարարեց, որ կողմ են քվեարկելու նախագիծն օրակարգում ընդգրկելուն, որպեսզի հնարավորություն տան այն հետագայում առավել խորը, մասնագիտական վերլուծության ու քննարկման ենթարկելու։
Արդյունքում նախագիծը ԱԺ 6-րդ գումարման 4-րդ նստաշրջանի օրակարգում ներառելու հարցն ընդունվեց միաձայն։
Նշենք, որ 103 պատգամավորներից նիստին ներկա էին 86-ը։


Մեկնաբանություններ


Համընկնող լուրեր