Կիրկորովներն էթնիկ հայեր են.Իմ նախնիները հանգչում են Քիշնևի գերեզմանատանը. Բեդրոս Կիրկորով
Sputnik ռադիոկայանի մոլդովական ծառայության եթերում ռուսական շոու բիզնեսի աստղ Ֆիլիպ Կիրկորովի հայրը՝ բուլղարահայ երգիչ Բեդրոս Կիրկորովը հայտնել է, որ իր նախնիները թաղված են Մոլդովայում:Լրատվամիջոցը նախկինում գրել էր, որ Մոլդովան մեծ դեր է խաղում ոչ միայն հայտնի երգիչ Ֆիլիպ Կիրկորովի, այլև նրա նախնիների կյանքում:
Նշվում է, որ Քիշնևի հին գերեզմանատանը, որտեղ նախկինում հայեր, ավելի ուշ կաթոլիկ լեհեր են թաղված եղել, 19-20-րդ դարերում տեղադրված մի քանի գերեզմանաքարեր կան: Այդտեղ Կիրկորով ազգանունը կրող մարդիկ են թաղված:
Բեդրոս Կիրորովը նշել է, որ Կիրկորովներն էթնիկ հայեր են, որոնք, ցեղասպանությունից փախչելով, սփռվել են աշխարհով մեկ: Նրանցից որոշ ընտանիքներ, ինչպես Բեդրոս Կիրկորովի ընտանիքը, հայտնվել են Բուլղարիայում, որոշները՝ Ռումինիայում (Բուխարեստում այժմ շատ Կիրկորովներ են ապրում), որոշներն էլ գաղթել են Ֆրանսիա:
«Իմ հեռավոր նախնիները թաղված են այստեղ՝ Մոլդովայում: Վերջերս՝ 10 տարի առաջ իմացա, որ քիշնևյան գերեզմանատանը Կիրկորով ազգանունով մարդիկ են թաղված: Ես այցելեցի գերեզմանատուն և գրի առա բոլորի անունները: Այնուհետև, երբ Փարիզում էի, հանդիպեցի տեղի բարեկամներիս հետ. նրանք ինձ ասացին, որ, այո՛, մեր գերդաստանի ներկայացուցիչները թաղված են Քիշնևում: Նրանք մեր նախնիներն են, որոնք Քիշնևում բժիշկներ են եղել»,- ասել է Բեդրոս Կիրկորովը:
