Հեյդար Ալիևը Ադրբեջանի բոլոր խաղատները փակել էր՝ վերահսկելու խաղամոլ որդուն. նա արեց այն, ինչ հայրը չէր կարող
Գերմանական Süddeutsche Zeitung թերթը հոդված է հրապարակել Իլհամ Ալիևի անցյալի և բռնապետական ռեժիմի մասին։Հոդվածում ասվում է, որ Իլհամ Ալիևն Ադրբեջանում իր խնդիրները լուծում է ուժով, իսկ արտերկրում՝ խավիարային դիվանագիտությամբ: Ալիևը փոխել է Սահմանադրությունը՝ ընդմիշտ իշխանության գլուխ մնալու համար: Ընտրություններում հաղթում է միայն մանիպուլյացիայի միջոցով: Երկրում ձերբակալվում են ընդդիմադիրներ, իշխանության քննադատներ և իրավապաշտպաններ:
Պարբերականը գրում է «խավիարային դիվանագիտության» մասին, մասնավորապես` որ խավիարի կիլոգրամները օգնում են կոծկել Ալիևի ռեժիմի` երկրում մարդու իրավունքների խախտումները և ընտրություններ կեղծելը: Ադրբեջանի եվրոպացի լոբբիստները դրական են գնահատում Ադրբեջանում անցկացվող ընտրությունները թանկարժեք նվերների ու հարուստ ընդունելությունների շնորհիվ:
Հոդվածում ասվում է, որ Իլհամ Ալիևը իշխանություն է ստացել հորից: Շատ է խոսվում այն մասին, որ Իլհամ Ալիևը խաղամոլ էր, և 1997-ին Ադրբեջանի բոլոր խաղատները փակվել են, քանի որ Հեյդար Ալիևը ցանկանում էր վերահսկել որդու կախվածությունը:
Հոդվածում նշվում է, որ անցյալ տարի նա կարողացել է անել այն, ինչ հայրը չէր կարող: Ադրբեջանական զորքերը գրավել են հայերի կողմից վերահսկվող Լեռնային Ղարաբաղի մի մասը:
Հիշեցնենք, որ վերջին շաբաթների ընթացքում գերմանացի 4 պատգամավոր մեղադրվել է Ադրբեջանից գումար ստանալու և այդ երկրի օգտին Եվրոպայում քարոզ տանելու համար։
