Ադրբեջանի ԱԳՆ-ում կարծում են, որ ղարաբաղյան հակամարտության հարցում ՄԱԿ-ը սուբյեկտիվ դիրքորոշում ունի
Ադրբեջանի ԱԳՆ-ում պատասխանել են հայկական կողմի բողոքին՝ օկուպացված Շուշիում ՄԱԿ-ի ներկայացուցիչների մասնակցությամբ միջոցառում անցկացնելու հետ կապված։Հիշեցնենք, որ մարտի 18-ին ՄԱԿ-ի ներկայացուցիչները, այդ թվում Ադրբեջանում կազմակերպության ռեզիդենտ-համակարգող Վլադանկա Անդրեեւան, այցելել էին Շուշի՝ մասնակցելու Ադրբեջանի եւ ՄԱԿ-ի գործընկերության 30-ամյակին նվիրված միջոցառմանը։
Արցախի ԱԳՆ-ն այս առիթով բողոք էր հայտնել։ Հայաստանի ԱԳՆ-ն նոտա էր ներկայացրել ՀՀ-ում ՄԱԿ-ի մշտական համակարգողի պաշտոնակատարին։
Ի պատասխան՝ Բաքվում անհրաժեշտ են համարել արձագանքել։ Մարտի 20-ին Ադրբեջանի ԱԳՆ-ի պաշտոնական ներկայացուցիչ Լեյլա Աբդուլաեւան հայտարարել էր, որ «Հայաստանի արտաքին քաղաքական գերատեսչության բողոքը Շուշիում անցկացվող միջոցառմանը ՄԱԿ-ի ներկայացուցիչների մասնակցության հետ կապված՝ անհիմն է եւ անթույլատրելի»։ Ինչպես եւ պետք էր սպասել, Աբդուլաեւան հայտարարել է օկուպացված Շուշիի «ադրբեջանական պատկանելության» մասին։ «Ադրբեջանի հանդեպ Հայաստանի դեռեւս շարունակվող տարածքային նկրտումները ցույց են տալիս, որ այդ երկիրը դասեր չի քաղել 44-օրյա պատերազմից»,- ասել է նա։
Այնուհետեւ Ադրբեջանի ԱԳՆ-ի ներկայացուցիչը հայտարարել է, որ «ՄԱԿ-ը երբեք չեզոք դիրքորոշում չի արտահայտել հայ-ադրբեջանական հակամարտության վերաբերյալ», եւ վկայակոչել է ՄԱԿ-ի այն բանաձեւերը, որոնք ադրբեջանական կողմը ներկայացնում է խեղաթյուրված ձեւով։
Այսպիսով, Ադրբեջանի ԱԳՆ-ի ներկայացուցիչը կասկածի տակ է դրել ՄԱԿ-ի օբյեկտիվությունն ու անաչառությունը։ Կազմակերպության ներկայացուցիչներն առայժմ չեն հերքել այս պնդումը։
