Շնորհակալ ենք,իսկական առաջնորդի իսկական խոսքեր՝«ցեղասպանություն», իրերն իրենց անուններով կոչելը կարևոր է չարին դիմակայելու համար
Ուկրաինայի նախագահ Վլադիմիր Զելենսկին արձագանքել է ամերիկացի գործընկեր Ջո Բայդենի հայտարարությանն առ այն, որ Ռուսաստանն ուկրաինացի ժողովրդի «ցեղասպանություն» է իրագործում:Զելենսկին ասել է, որ դրանք «իսկական առաջնորդի իսկական խոսքեր» են։ Համապատասխան հաղորդագրությունը հրապարակվել է չորեքշաբթի՝ Զելենսկու թվիթերյան միկրոբլոգում։
Միաժամանակ ուկրաինական պետության ղեկավարը նշել է, որ չարիքի դեմ պայքարում կարևոր է իրերն իրենց անուններով կոչել։
«Իսկական առաջնորդ Ջո Բայդենի իսկական խոսքերը: Իրերն իրենց անուններով կոչելը կարևոր է չարին դիմակայելու համար: Մենք երախտապարտ ենք ԱՄՆ-ի կողմից արդեն իսկ ցուցաբերած օգնության համար, բայց շտապ անհրաժեշտ է ավելի ծանր զենքեր՝ կանխելու ռուսական հետագա վայրագությունները», - ասվում է ուղերձում:
ԱՄՆ նախագահ Ջո Բայդենն Այովա նահանգում ունեցած ելույթի ժամանակ Ռուսաստանի առաջնորդ Վլադիմիր Պուտինին անվանել է «բռնապետ», իսկ Ուկրաինայում ՌԴ-ի իրականցվող հատուկ ռազմական գործողությունը՝ «ցեղասպանություն»։
Այսպես, ԱՄՆ նախագահի հայտարարությունը հնչել է, երբ նա ափսոսանք է հայտնել գազի գնի թանկացման առնչությամբ։
«Ձեր ընտանեկան բյուջեն, մեքենայի բաքը լիցքավորելու ձեր կարողությունը չպետք է կախված լինեն նրանից, թե արդյոք բռնապետը պատերազմ կհայտարարի և ցեղասպանություն կկատարի աշխարհի մյուս ծայրում», - բառացի ասել է Բայդենը:
Ավելի ուշ, նախքան Վաշինգտոն թռչելը, Սպիտակ տան ղեկավարը մեկնաբանել է իր խոսքերը.«Ես դա անվանեցի ցեղասպանություն, քանի որ ավելի ու ավելի պարզ է դառնում, որ Պուտինը պարզապես փորձում է ոչնչացնել ուկրաինացի լինելու գաղափարը: Եվ ապացույցներն աճում են: Մենք միջազգային մակարդակով իրավաբաններին թույլ կտանք որոշել՝ արդյոք դա կարող է համապատասխան որակավորվել, թե ոչ, բայց ինձ համար դա այդպես է»,- ասել է Բայդենը:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին:
