Ռուսաստանը նախազգուշացրել է, որ «Մեծ Բրիտանիան չափազանց խորացել է» ուկրաինական հակամարտության մեջ
Մեծ Բրիտանիան «չափազանց խորացել է» ուկրաինական պատերազմում, հայտարարել է Ռուսաստանի դեսպանը` միաժամանակ պնդելով, որ ՌԴ նախագահ Վլադիմիր Պուտինը միջուկային զենք չի կիրառի Ուկրաինայում:Ինչպես գրում է Daily Mail-ը, դեսպան Անդրեյ Կելինը պնդել է, որ ապացույցներ ունի առ այն, որ Մեծ Բրիտանիայի հատուկ նշանակության ուժերը մասնակցել են Ուկրաինայի կողմից Ռուսաստանի Սևծովյան նավատորմի վրա հարձակմանը:
Խոսելով Sky News-ի հաղորդավար Մարկ Օսթինի հետ՝ Կելինն ասել է.«Մենք քաջատեղյակ ենք Սև ծովում ռուսական ենթակառուցվածքների և ռուսական նավատորմի դեմ բռնության իրականացման հարցում բրիտանացի մասնագետների՝ ուսուցմանը, նախապատրաստմանը և իրականացմանը մասնակցության մասին: Մենք գիտենք, որ դա արվել է»։
Կելինը նաև նշել է, որ համապատասխան ապացույցները կհրապարակվեն «շատ շուտով»:
«Սա իրականում նախազգուշացում է, որ Բրիտանիան չափազանց խորն է այս հակամարտության մեջ։ Դա նշանակում է, որ իրավիճակը գնալով ավելի վտանգավոր է դառնում», -շեշտել է Կելինը։
Սակայն Մեծ Բրիտանիայի արտաքին գործերի նախարար Ջեյմս Քլիվերլին կտրականապես մերժել է Ռուսաստանի դեսպանի պնդումները:
