Արդյոք զենքի գնման հետ կապված ՌԴ–ն հանդիսանո՞ւմ է խոչընդոտ
Զենքի գնումների և մնացածի մասով Հայաստանը ժամանակին շատ թափանցիկ է եղել և այդ թափանցիկությունը վնասել է ՀՀ պետական շահերին։ Այս մասին Ազգային ժողովում ճեպազրույցի ժամանակ ասաց Վահագն Ալեքսանյանը` ի պատասխան հարցադրմանը` արդյոք Հնդկաստանից զենք ձեռք բերելու հետ կապված խոչընդոտներ կան, թե ոչ։Ավելի վաղ նախկին պատգամավոր Գայանե Աբրահամյանը հայտարարել էր, թե ունի տեղեկություն, որ ՌԴ-ն խոչընդոտում է, որ Հնդկաստանից Հայաստանը զենք գնի։
Նախկին գործընկերոջ այս հայտարարությանը Ալեքսանյանը ծանոթ չէր։
«Չգիտեմ ինչի մասին է խոսքը, չեմ լսել նման հայտարարություն։ Բայց առհասարակ` թե՛ մատակարարումների հետ կապված, թե՛ ճանապարհի տրանսպորտացիայի և մնացածի հետ կապված փորձում ենք շատ չխոսել, չծավալվել։ Թույլ տվեք Հնդկաստանի զենքի գնումների և մնացածի մասով հանրային որևէ քննարկում չծավալել»,–ասաց Ալեքսանյանը։
Ճշտող հարցին` արդյոք զենքի գնման հետ կապված ՌԴ–ն հանդիսանո՞ւմ է խոչընդոտ, իշխող ուժի պատգամավորը ո՛չ ժխտեց, ո՛չ էլ հաստատեց` նշելով, որ ավելացնելու ոչինչ չունի։
