Անհիմն են. ՀՀ քննչական կոմիտեն՝ քաղաքացու մեղադրանքների մասին, թե իրեն ՔԿ-ում խոշտանգել են, ծեծել և ահաբեկել
Տիգրան Առաքելյանը, որը «Հայ ազգային կոնգրես»-ի նախկին ակտիվիստ է, «Ֆեյսբուք»-ի իր էջում տեսաուղերձի միջոցով պատմել է, թե ՀՀ քննչական կոմիտեում «էլեկտրաշոկով խոշտանգել են իրեն, որին մասնակցել է անձամբ կառույցի ղեկավար Արգիշտի Քյարամյանը»:Վերջինիս խոսքով՝ «ՔԿ-ում իրեն պահել են 11 ժամ, դրանից մոտ 8-9 ժամը եղել է ձեռնաշղթաներով, ենթարկվել ծեծի, հայհոյանքների, շանտաժի, սպառնալիքների»։
Առաքելյանի հայտարարությունների հետ կապված ՀՀ քննչական կոմիտեից «Հայկական ժամանակ»-ին հայտնեցին, որ դրանք անհիմն են, անհեթեթ, նաև նշեցին, որ պարզելու համար կա իրավական ընթացակարգ, և անձը կարող է օգտվել այդ ընթացակարգից։
Տիգրան Առաքելյանի նկատմամբ հարուցվել է հանրային քրեական հետապնդում ՀՀ քրեական օրենսգրքի 258-րդ հոդվածի 2-րդ մասի 8-րդ և 10-րդ կետերով (շորթումը, որը կատարվել է մի խումբ անձանց կողմից նախնական համաձայնությամբ՝ իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով) և 46-490-րդ հոդվածի 2-րդ մասով (դատավորի, դատախազի, քննիչի, քննչական մարմնի ղեկավարի, հետաքննության մարմնի, փաստաբանի, ներկայացուցչի, փորձագետի նկատմամբ սպառնալիքը կամ նրանց մասին տեղեկություն հրապարակելը կամ նրանց գույքը ոչնչացնելը կամ վնասելը կամ նրանց նկատմամբ բռնություն գործադրելը):
Միջնորդություն է ներկայացվել դատարան՝ նրա նկատմամբ կալանքը որպես խափանման միջոց ընտրելու վերաբերյալ։ Դատարանը, սակայն, այլընտրանքային խափանման միջոց՝ տնային կալանք է կիրառել։
