ԱՄՆ-ն և Իրանը դեռևս չեն հասել խաղաղության պայմանավորվածությունների, բայց շատ մոտ են դրան
ԱՄՆ-ն և Իրանը դեռևս չեն հասել խաղաղության պայմանավորվածությունների, բայց շատ մոտ են դրան: Այս մասին հայտարարել է ԱՄՆ փոխնախագահ Ջեյ Դի Վենսը, հաղորդում է ՏԱՍՍ-ը:«Մենք դեռ այդ փուլում չենք, բայց մենք շատ մոտ ենք։ Մենք կշարունակենք աշխատել այդ ուղղությամբ»,- ասել է նա լրագրողներին։
Ավելի վաղ Axios պորտալը, հղում անելով աղբյուրներին, հայտնել էր, որ ամերիկացի և իրանցի բանակցողները համաձայնեցրել են փոխըմբռնման հուշագրի նախագիծը, որը նախատեսում է 60-օրյա հրադադար և խորհրդակցությունների մեկնարկ Իրանի միջուկային ծրագրի շուրջ։
Պարբերականի տվյալներով՝ փաստաթուղթը սպասում է ԱՄՆ նախագահ Դոնալդ Թրամփի վերջնական հաստատմանը։ Սակայն ավելի ուշ իրանական Tasnim գործակալությունը, հղում անելով բանակցային թիմին մոտ կանգնած աղբյուրին, հայտնել է, որ հուշագրի տեքստը մինչ օրս չի համաձայնեցվել և չի հաստատվել։
