Ադրբեջանի իշխանություններն ուկրաինացի լրագրողների համար շրջայց են կազմակերպել գրավյալ հայկական շրջանի օդանավակայանում
Ադրբեջանի իշխանություններն ուկրաինացի լրագրողների համար շրջայց են կազմակերպել գրավյալ հայկական Վարանդա շրջանի օդանավակայանում։ Ադրբեջանական լրատվամիջոցների հաղորդմամբ՝ շրջայցին մասնակցել են ուկրաինական «1+1» եւ «5-րդ ալիք» հեռուստաալիքների, UNIAN լրատվական գործակալության, «Украина сейчас» եւ «Третья сила» ինտերնետ-պարբերականների աշխատակիցները:
«Մեր աչքերով տեսանք օկուպացիայի 27 տարիների ընթացքում Ֆիզուլի քաղաքում հայերի կողմից իրականացված վայրագությունների, վանդալիզմի վկայությունները։ Լրագրողներին մանրամասն տեղեկատվություն է տրամադրվել այն մասին, որ օկուպացիայի շրջանում հայկական ահաբեկչության հետեւանքով Ֆիզուլիի շրջանի 105 հազար բնակիչներ զոհվել են, ավերվել են հասարակական շենքեր, տներ, գործարաններ, դպրոցներ, մանկապարտեզներ»,-ադրբեջանական ԶԼՄ-ների կողմից ներկայացվում են սարսափազդու, բայց իրականությունից շատ հեռու «տվյալներ»։
Դատելով հաղորդագրությունը պատկերող լուսանկարներից՝ Ուկրաինայից ժամանած հյուրերին եթե ինչ-որ բան մանրամասն ներկայացվել է, ապա դա բացառապես օդանավակայանն է։ Նույն լուսանկարից կարելի է դատել, որ ներկայացված «տեղեկատվությունն» այնքան էլ չի հետաքրքրում լրագրողներին, որոնք ակնհայտորեն մտահոգված են իրենց հայրենիքում տեղի ունեցող իրադարձություններով ։
