Այսքանից հետո ի՞նչ պետական գաղտնիքի մասին կարող է խոսք լինել
«Հանձինս նախկին գլխավոր դատախազի, ունենք բարձրաստիճան պաշտոնյաներ, որոնք ի պաշտոնե կրում են պետական գաղտնիքներ, հայտնվում են մի երկրում՝ իրենց հետ տանելով այդ գաղտնիքը»,- այսօր «Մեդիա կենտրոնում» «Հեղափոխությունը հասե՞լ է ԱԱԾ, թե՞ շրջանցել է այն. ՀԿ-ները մտահոգված են» թեմայով քննարկման ժամանակ մտահոգություն հայտնեց իրավապաշտպան Արթուր Սաքունցը:Ըստ Սաքունցի՝ անվտանգության բուն էությունն անվտանգության գաղտնիքն է, պետական գաղտնիքի պաշտպանվածությունը: «Խոսել պետական գաղտնիքի մասին, այն դեպքում, որ այդ գաղտնիքը կրողները երկրից դուրս են և մեկ պետության ոչ միայն հսկողությունը, այլև հովանավորությունն են ստանում, առավել քան մեծ մարտահրավեր է Ազգային անվտանգությանը, ես չեմ կարողանում պատկերացնել: Եվ այդ մարդիկ հայտնվում են հենց Ազգային անվտանգության ծառայության գոյության պայմաններում»,- շարունակեց իրավապաշտպանը՝ անելով հարցադրում. «Արդյոք կարելի՞ է համարել պետական գաղտնիք այն տեղեկատվությունը, որը տիրապետում են այդ մարդիկ, որոնք դուրս են ՀՀ տարածքից: Այսինքն՝ ի՞նչ պետական գաղտնիքի մասին այլևս խոսք կարող է լինել»:
Ա. Սաքունցն այստեղ խնդիր է տեսնում և գալիս այն եզրահանգման, որ ՀՀ ինքնիշխան, ժողովրդավարական, իրավական պետության շահերից բխում է ունենալ իրապես Ազգային անվտանգության ծառայություն:
