Ալկոհոլային խմիչքից զանգվածային թունավորման գործով մեղադրյալ Հովսեփյանին կալանավորելու մասին որոշման դեմ վերաքննիչ բողոք է ներկայացվել
Ալկոհոլային խմիչքից զանգվածային թունավորման գործով մեղադրյալ Աշոտ Հովսեփյանին կալանավորելու որոշման դեմ վերաքննիչ բողոք է ներկայացվել։ Այս մասին հայտնեց Հովսեփյանի պաշտպան Գոռ Գևորգյանը՝ նշելով, որ բողոքը դեռևս չի մակագրվել։Ավելի վաղ հայտնել ենք, որ Արմավիրի մարզի ընդհանուր իրավասության դատարանը բավարարել էր Աշոտ Հովսեփյանի նկատմամբ կալանավորումը որպես խափանման միջոց ընտրելու մասին քննիչի միջնորդությունը՝ հաստատված համարելով հիմնավոր կասկածը և միևնույն ժամանակ նշելով, որ առկա է գործով անցնող անձանց վրա անօրինական ազդեցություն գործադրելու ռիսկը։
Պաշտպանը հայտնեց, որ վերաքննիչ բողոքով վիճարկվել է թե՛ հիմնավոր կասկածի, թե՛ կալանավորման հիմքերի առկայությունը։
Նշենք, որ օգոստոսի 31-ից սեպտեմբերի 5-ն ընկած ժամանակահատվածում գրանցվել է ալկոհոլային թունավորման 46 դեպք՝ Արմավիրում, Կոտայքում, Երեւանում, որից 17-ը՝ մահվան ելքով: Դեպքի առթիվ ՀՀ քննչական կոմիտեի Արմավիրի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 279-րդ հոդվածի (անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը) 3-րդ մասի հատկանիշներով: Հովսեփյանին մեղադրանք է առաջադրվել ՀՀ քրեական օրենսգրքի 207-րդ հոդվածի 2-րդ մասով՝ կեղծ օղի արտադրելու կամ իրացնելու համար, որն անզգուշությամբ առաջացրել է մարդու մահ կամ ծանր հետևանքներ։ Հովսեփյանն առաջադրված մեղադրանքը չի ընդունում։
ՔԿ-ից «Փաստինֆո»-ին հայտնեցին, որ քրեական գործով մեղադրանք է առաջադրվել երեք անձի, մասնավորապես, Աշոտ Հովսեփյանին մեղադրանք է առաջադրվել՝ ՀՀ քրեական օրենսգրքի 207-րդ հոդվածի ((կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելը կամ իրացնելը) 2-րդ մասով: Եվս երկու անձի մեղադրանք է առաջադրվել՝ ՀՀ քրեական օրենսգրքի 38-207-րդ հոդվածի (կեղծ գինի կամ կեղծ օղի կամ ալկոհոլային կեղծ այլ խմիչք իրացման նպատակով պատրաստելուն կամ իրացնելուն օժանդակելը) 2-րդ մասով: Երեք մեղադրյալները կալանավորվել են։
